විශ්ව ක්‍රියාකාරීත්වය සහ මරණින් මතු නැගිටුවීම
මේ යටතේ ඉස්ලාම් දහම ඇතුළු බොහෝ දහමන් තුල කථා කරන 'මරණින් මතු නැගිටුවීම' යන විෂය ඉස්ලාම් දහමේ ඉගෙන්වීමන් සහ නූතන විද්‍යාත්මක අණාවර්ණයන් සමඟ සංසන්දනාත්මක විමසා බැලීම මෙම මණ්ඩපය තුල මෙතැන් සිට කථා කිරීමට අදහස් කරමි.
"විශ්ව ක්‍රියාකාරීත්වය සහ මරණින් මතු නැගිටුවීම ඉස්ලාමීය විමසුමක්"
'මරණින් පසු අපට කුමක් වේවිද?' යන කුතුහලය ඇයි?
‘මරණින් පසු අපට කුමක් වේවිද?’ මේ මිනිස් සමාජයේ අති බහුතරයකට ඇති පැනයකි. මේ පිලිබදව ලොව පවතින දහමන් හා දර්ශනයන් විවිධ ඉගෙන්වීමන් හා අවවාදයන් මිනිස් සමාජයට ඉදිරිපත් කරයි. නමුත් ඒ ඉගෙන්වීමන්ට එතරම් ඉහල පිලිගැනීමක් නොලැබෙන බවක් සමාජයේ ක්‍රියාකලාපයන් සහ විවිධ ප්‍රකාශයන් දකින විට පෙනීයයි. මෙවැනි අවිශ්වාසනීය තත්වයන් සමාජය තුල ගොඩනැඟෙන්න බලපාන හේතු කාරණා කුමක්ද? යන්න සොයා බලන විට එහි ප්‍රධාන හේතුකාරණා කිහිපයක් දකින්නට ලැබේ.
එනම්,
- දහමක් යැයි සිතා මනක්කල්පිතයන් පිලිපැදීම තුල ඇති වන ව්‍යාකූලත්වය,
- දහමේ ඉගෙන්වීමන් පිලිබදව තිබෙන අවම දැනුම,
- සමහරක් දහමන් තුල පරස්පර ඉගෙන්වීමන් පැවතීම,
- දහමේ ඉගෙන්වීමන් පිලිබදව තිබෙන අවිශ්වාසය,
- සියල්ල විද්‍යාත්මකව හා තාර්කිකව පමණක් දකින්නට උත්සාහ කිරීම,
මෙවන් පසුබිමක ‘ඉස්ලාම් දහම මේ පිලිබදව කුමක් පවසනවාද? යන්නත්, එසේ කථා කරන කරුණු විද්‍යාත්මකව හා තාර්කිකව කොතරම් සැසේදේද? යන්නත්’ මෙම ‘විශ්ව ක්‍රියාකාරීත්වය සහ මරණින් මතු නැගිටුවීම’ යන ලිපිය තුලින් මෙතැන් සිට කථා කිරීමට අදහස් කරමි.
අපි පොළොවට පස් වූවායින් පසුත් නැවත නැඟිටුවන්නේද?
ඉස්ලාම් දහම තුල පමණක් නොවේ කිතුනු දහම සහ යුදෙව් දහම තුලත් මරණින් මතු නැඟිටුවීම හා තමන් කල කුසල් අකුසල් එහි විනිශ්චය කිරීම පිලිබදව කථා කරයි. මා මෙසේ පවසන විට සමහරක් ට ‘අපි මැරිලා පොළොවට පසු වුනායින් පසු මොන නැඟිටුවීමක්ද?’ යනුවෙන් සිතෙන්නට පුළුවන. මිනිසුන්ට මෙහෙම සිතුනේ අද ඊයේ පමණක් නොවේ. මීට වසර 1400 කට පෙර විසූ සමාජවලත් මිනිසුන් එහෙම සිතූ බව අල්කුර්ආනය මෙසේ පවසයි.
අපි මැරිලා, දූවිලි හා ඇටකටු බවට පත් වූ විට, අපි නැවත නැඟිටුවන්නෙමුද?
අල්කුර්ආනය 56-47
මෙසේ ‘අප මැරී පොළොවට පස් වූවායින් පසු නැවත නැඟිටුවීම’ යන්න විහිළුවක් මිත්‍යාවක් යැයි සිතන පිරිසට අල්ලාහ් (දෙවි) එදාම අල්කුර්ආනය තුලින් පිලිතුරක් ලබාදේ. ඒ නිකන්ම නිකන් පිලිතුරක් ලෙස නොව වර්ථමාන ලෝකය අණාවර්නය කොටගෙන තිබෙන ‘ඇගිලිසලකුණු (Fingerprint)’ පිලිබදව විශ්මිත සත්‍යයක්ද අන්තර්ගත කරමිනි. එය මෙසේය,
(මරණයට පත්ව දිරා පත් වී පස් බවට පත් වූ) ඔහුගේ ඇට කටු අපි එක්කාසු නොකරන්නෙමු යයි මිනිසා අදහස් කරමින් සිටින්නේද? නොඑසේය. ඔහුගේ ඇඟිළි තුඩු පවා (පෙර තිබූ ආකාරයටම) සකස් කිරීමට අපි බලසම්පන්න වන්නෙමු.
අල්කුර්ආනය 75-3 හා 4
මෙම අල්කුර්ආන් වාක්‍යය තුලින් අපගේ මරණින් මතු නැඟිටුවීම පමණක් නොව අපට ම ආවේනික අපගේ ‘ඇඟිලි සලකුණූ’ පවා එනම් ‘නුඹලා නැඟුටුවනවා පමණක් නොවේ. නුඹලාටම ආවේනික ‘ඇඟිලි සලකුණ’ (Fingerprint) පවා ඒ ආකාරයටම ප්‍රතිනිර්මාණය කරමි’ යනුවෙන් නැවත නැඟිටුවීම තහවුරු කරයි.
