අල්කුර්ආනය හෙවත් ශුද්ධ වූ ග්‍රන්ථය - විමසුම
විෂය හැදින්වීම
* හැදින්වීම - ලොවපුරා සිටින ඉස්ලාම් බැතිමතුන් තම දෙවියන් වන අල්ලාහ් (දෙවි) හමුවේ සිට පහල වූ දිව්‍ය පුස්තකය ලෙස මෙම පුස්තකය පිලිගනී.* පහල වූ ස්ථානය සහ කාලය -අරාබි දේශයේ “මක්කාව“ සහ “මදීනාව“ ආශ්‍රිතව ක්‍රී:ව: 610 - 632 දක්වා වූ කාලය තුල පහල විය.
* මුල් භාෂාව - අරාබි.
* පරිච්චේද සහ වාක්‍ය ගණන - පරිච්චේද 114 කින් සහ වාක්‍ය 6500 කටත් අධික ප්‍රමාණයකින් සමන්විතය.
* වැඩිදුර කරුණු කියවන්න - බ්‍රිටනිකා විශ්ව කෝෂය
ලිපිය හැදින්වීම
* මාතෘකාව - අල්කුර්ආනය හෙවත් ශුද්ධ වූ ග්‍රන්ථය* ලිපිය ආරම්භ දිනය -2009/12/09
* අවසන් යාවත්කාලීනය - 2024/03/22.
* ලිපියෙහි කතෘ - අබූ අර්ශද්
-
වර්ථමාන ලොකය තුල ආගම්, ඇදහිලි කණ්ඩායම් සහ නිකායන් රාශියක් දක්නට ඇත. සමහර විද්වතුන්ගේ ගණනය කිරීම අනුව එහි සංඛ්‍යාව 4,000 ඉක්මවයි. මෙම ආගම් හා ඇදහිලි කණ්ඩායම් අතර ප්‍රධාන කණ්ඩායම් එනම්, අනුගාමිකයින් සංඛ්‍යාව අනුව විශාලතම කණ්ඩායම් පහ වන්නේ ක්‍රිස්තියානි (31.4%), මුස්ලිම් (23.2%), හින්දු (15.0%), බෞද්ධ (7.1%) සහ ජන ආගම් (5.9%) යන්න වේ (1). (මෙම ආගම් පහට අමතරව ලොව අනිකුත් ආගම් හා ඇදහිලි කණ්ඩායම් අනුගාමික ප්‍රතිශතය 1% ටත් වඩා අඩු අනුපාතයන්ගෙන් යුතු බව ඔබේ වැඩිදුර දැනගැනීම පිණිස මෙහි සටහන් කරමි.) මේ එක් එක් ආගම් හා ඇදහිලිවලට ආවේනික ආගමික ග්‍රන්ථයක්ද පවතින අතර ඉස්ලාම් දහමේ ආගමික ග්‍රන්ථය “අල්කුර්ආනය“ නම් වේ.
මේ අනුව ඉස්ලාම් දහමේ, දහම් පුස්තකය වන අල්කුර්ආනය පිලිබදව සවිස්තරාත්මක විග්‍රහයක් හා කරුණු දැක්වීමක් මෙම අල්කුර්ආනය හෙවත් ශුද්ධ වූ ග්‍රන්ථය යන ලිපිය තුලින් මෙතැන් සිට ආරම්භ කරමි.
අල්කුර්ආනය හැදින්වීම
අල්කුර්ආනය (අල් කුර්ආනය) යනු ඉස්ලාම් දහමේ ශුද්ධ ග්‍රන්ථය වන අතර, එය ආසන්න වශයෙන් වසර 23ක කාලයක් පුරා මුහම්මද් (සල්) නබිවරයාණන්ට ජිබ්රීල් (නොහොත් ගේබ්‍රියෙල් (අලෛ)) දේවදූතයාණන් හරහා හෙළිදරව් කරන ලද දෙවියන් වහන්සේගේ වචනය යන්න මුස්ලිම්වරුන්ගේ විශ්වාසයයි. මෙම දේව හෙළිදරව්ව මිහිමතට පහළ වීම ක්‍රි:ව: 610 දී ආරම්භ වූ බව පැවසේ. එය සම්භාව්‍ය අරාබි භාෂාවෙන් පහල වී ලියා ඇති අතර ඇදහිල්ල, නමස්කාරය සහ දෛනික ජීවිතය සම්බන්ධයෙන් මුස්ලිම්වරුන්ට මඟ පෙන්වීමේ අවසාන මූලාශ්‍රය ලෙස සැලකේ.
අල් කුර්ආනය පරිච්ඡේද 114 කින් සමන්විත වන අතර ඒවා “සූරා“ ලෙස හැඳින්වේ, එම සූරාවන් හි දිග සහ අන්තර්ගතයෙන් වෙනස් වේ. එය දේවධර්මය, සදාචාරය, නීතිය, පුද්ගලික හැසිරීම් සඳහා මග පෙන්වීම සහ අතීත අනාගතවක්තෘවරුන් සහ ශිෂ්ටාචාරයන් පිළිබඳ කථා ඇතුළු පුළුල් පරාසයක මාතෘකා ආවරණය කරයි. අල් කුර්ආනය ආශ්චර්යමත් සහ කාලානුරූපී ග්‍රන්ථයක් ලෙස මුස්ලිම්වරුන් විසින් ගෞරවයට පාත්‍ර වන අතර එය ලොව පුරා මිලියන සංඛ්‍යාත මුස්ලිම්වරුන් විසින් පාරායනය කර කටපාඩම් ද කර ඇත.
එහි අධ්‍යාත්මික වැදගත්කමට අමතරව, අල් කුර්ආනය ඉස්ලාමීය ශිෂ්ටාචාරය, එහි කලාව, ගෘහ නිර්මාණ ශිල්පය, සාහිත්‍යය සහ නීති සම්ප්‍රදායන් හැඩගැස්වීම කෙරෙහි ප්‍රබල බලපෑමක් ඇති කර ඇත. එය (යුදෙව් දේව ග්‍රන්ථය වන) “ටෝරා“ සහ (ක්‍රිස්තියානි දේව ග්‍රන්ථය වන) “බයිබලය“ වැනි පූර්ව ශුද්ධ ලියවිලිවලට අනුපූරකව දෙවියන්වහන්සේගේ අවසාන සහ සම්පූර්ණ හෙළිදරව්ව ලෙස මෙම අල්කුර්ආනය මුස්ලිම්වරුන් විසින් සලකනු ලැබේ.
අල්කුර්ආනය පහල වීම
අල් කුර්ආනය දිව්‍ය පුස්තකයක් යන්න ඉස්ලාම් දහමේ ස්ථාවරයයි. එනම්, මෙය අල්ලාහ් (දෙවි)ගේ වදන් පමණක් අන්තර්ගත පුස්තකයක් යන්න ඉස්ලාම් දහමේ ඉගෙන්වීම සහ මුස්ලීම් සමාජයේ පිලිගැනීමයි. මෙම පුස්තකය අහසින් (දෙවියන් හමුවේ සිට) පොළොවට එකවර පහල වූ පුස්තකයක් නොවේ. මෙම අල්කුර්ආනය වසර 23ක් පුරා ක්‍රමානුකූලව මුහම්මද් (සල්) තුමාණන් මඟින් පොළොවට ප්‍රකාශ වූ දිව්‍ය වදන් හි එකතුවක් යන්න ඉස්ලාම් දහමේ ඉගෙන්වීමයි. එසේ වූවත් අල්කුර්ආනය 2-185 වාක්‍යය මෙම අල් කුර්ආනය රමසාන් (උපවාස) මාසයේ පහල කල බව පවසයි. ඒ අනුව මෙහි පරස්පරතාවයක් දක්නට ලැබේ. එමනිසා මෙම ලිපියෙහි පලමු පියවර ලෙස ඉහත පරස්පරතාවය විසඳා ගැනීමට අප උත්සාහ කරමු.
ඉස්ලාම් දහමේ ඉගෙන්වීමන් හොඳින් අධ්‍යනය කරන්නේ නම්, දිව්‍ය පුස්තකය වන අල්කුර්ආනය අදියර තුනකික් පොළොවට පහල වූ බව පෙනී යයි. එම අදියර තුන පියවරින් පියවර විමසා බලන්නේ නම්,
අල් කුර්ආනය ඉදිරිපත් වූ පියවරයන් 03 පහත ආකාරයට වේ...
- අල් ලව්හුල් පහ්ෆූල් පලකයේ සටහන් කිරීම,
- ලව්හුල් මහ්ෆූල් පලකයේ සිට පහල අහසට පහල කිරීම,
- පහල අහසේ සිට පොළොවට පහල කිරීම,
පලමු පියවර - අල් කුර්ආනය ලව්හුල් පහ්ෆූල් හි සටහන් කිරීම
අල්ලාහ් (දෙවි) විසින් මුලින්ම මවන ලද්දේ “පෑන“ නොහොත් ලිවීමට යොදාගන්න උපාංගයයි. ඉන්පසු ලියන පලකය නොහොත් “අල් ලව්හුල් පහ්ෆූල් පලකය“ මවා එහි සියල්ල “ලියන්න“ යැයි “පෑන“ට අණ කල බව පැවසේ. ඒ අනුව මෙලොව සිදුවන සියල්ල එනම්, එය කොතරම්ද යන්න පවසනවා නම්, ගසකින් ගිලිහෙන පත්‍රයක් එය කුමන තත්වයේ ගිලිහෙන්න අවශ්‍යද (එනම් අමුවෙන්ද, ඉඳිලාද, වියලිවද...), එය පොළොවේ කවර තැනක පතිත වන්න අවශ්‍යද, එය කවදා සිදුවිය යුතුද... යනාදී ලෙස සියළු සංසිද්ධීන් එම පලකය මත සවිස්තරව සටහන්ව ඇත. මෙම පලකය පිලිබදව නබිතුමාණන් අපට පැවසූ හදීසයක් මෙහි ඔබේ අවදානයට ගෙන එන්නේ නම්,
මුහම්මද් (සල්) තුමාණන් මෙසේ පැවසීය, "අල්ලාහ් මැවූ පළමු දෙය පෑනයි. ඔහු ( අල්ලාහ්) එයට “ලියන්න” යැයි කීවේය. ‘අන්තිම හෝරාව පැමිණෙන තුරු සියල්ල ගැන නියම කර ඇති දේ එහි ලියවීය
මූලාශ්‍ර අල්හදීස් ග්‍රන්ථය - අබූදාවූද්,
මේ අනුව මානව සංහතියටම යහමඟ පෙන්වන “අල් කුර්ආනය“ ද එම “අල් ලව්හුල් පහ්ෆූල් පලකය“ මත එදා සටහන් වූවා යන්න පැහැදිලිව අවබෝධ කරගත යුතු වේ. එම කාරණය තහවුරු කරන අල් කුර්ආන් වාක්‍යයක් මෙහි ඔබේ බුද්ධිමත් විමසුමට ගෙන එන්නේ නම්,
ලව්හුල් මව්ෆූල්හි මෙම උසස් ශුද්ධ වූ කුර්ආනය සටහන් කර ඇත.
අල්කුර්ආනය 85 - 21 සහ 22
මේ අනුව පලමු පියවර ලෙස අල් කුර්ආනය මුලින්ම සටහන් වූයේ “ ලව්හුල් මව්ෆූල්“ හි යන්න පැහැදිලි වේ. මෙතැනදී ඔබගේ වැඩිදුර දැන ගැනීම පිණිස විශේෂ කාරණයක් සටහන් කරන්නේ නම්, මෙම “ලව්හුල් මව්ෆූල්“ පලකය මත සටහන් වී ඇති දත්ත කිසිදු දිනක කිසිදු ආකාරයකින් සංශෝධනය නොවේ යන්නත් ඉස්ලාම් දහමේ ඉගෙන්වීමයි. (2)
දෙවන පියවර - අල් කුර්ආනය ලව්හුල් මහ්ෆූල් පලකයේ සිට පහල අහසට පහල කිරීම
ඉහතින් විස්තර කල ආකාරයට “ලව්හුල් මව්ෆූල්“ පලකයේ සටහන් වී තිබූ අල් කුර්ආනය දෙවන පියවර ලෙස එම පලකයේ සිට පහල අහසට එකවර පහල වූ බව පැවසේ. මේ පිලිබදව මුහම්මද් (සල්) තුමාණන්ගේ සමකාලීන ආගමික විශාරදයෙකු වන ඉබුනු අබ්බාස් (රලි) තුමා ඇතුළු බොහෝ පිරිස් පවසන්නේ,
"අල්ලාහ් විසින් අල්-කුර්ආනය එකවරම (අල්-ලව්හ් අල්-මහ්ෆුල්) සංරක්ෂිත පුවරුවෙන් ස්වර්ගයේ පිහිටි ගෞරවනීය මන්දිරය වන බයිතුල්-ඉස්සා වෙත පහළ කළේය."
මූලාශ්‍ර ග්‍රන්ථය - හාකිම්, නසායි, බයිහකි
මේ ආකාරයට “අල්-ලව්හ් අල්-මහ්ෆුල්“ පලකයේ සිට සමස්ථ අල් කුර්ආනයම එකවර “අල්-බයිත් අල්-ඉස්සා“ (ගෞරවනීය මන්දිරය) වෙත රමසාන් (උපවාස) මාසයක “ලයිලතුල් කද්ර්“ නම් රාත්‍රියක පහල වීම සිදු වූ අතර එම සිදුවීමයි අල් කුර්ආනය පහත ආකාරයට විස්තර කරන්නේ.
රමළාන් මාසය (කවරාකාර මාසයක් වන්නේද යත්) මනුෂ්‍ය වර්ගයාට (පරිසමාප්ත) මඟපෙන්වීම හා (නිවැරදි මාර්ගය දක්වන) පැහැදිලි ඉගැන්වීම්වලින් යුක්ත හා (සත්‍යය හා අසත්‍යය තෝරාගැනීමේ) මිණුම් දණ්ඩ ද, සැපයෙන අල්-කුර්ආනය පහළ කරන ලද මාසය වේ
අල්කුර්ආනය 2-185
මෙය අල් කුර්ආනයේ තවත් තැනක පැවසීමේ දී එක් එක් රාත්‍රියක පහල කල බව මෙසේ පවසයි.
නියත වශයෙන්ම අපි එය (අල් කුර්ආනය) කීර්තිමත් (කද්ර් නම්) රාත්‍රියෙහි පහළ කළෙමු.
අල්කුර්ආනය 97-1
ඉහත ඉගෙන්වීමන් අනුව පැහැදිලි වන්නේ, රමසාන් (උපවාස) මාසයක “ලෙයිලතුල් කද්ර්“ නම් රාත්‍රියක අල් කුර්ආනය දෙවන පියවර ලෙස “අල්-ලව්හ් අල්-මහ්ෆුල්“ නම් පලකයේ සිට පහල අහසේ “බයිතුල් ඉස්සා“ නම් මන්දිරය වෙත පහල වූ බවයි.
තුන්වන පියවර - අල් කුර්ආනය පහල අහසේ සිට පොළොවට පහල කිරීම
අල් කුර්ආනය මිහිතලයට පහල වීම අල් කුර්ආනය තුන්වන පියවර පහල වීම ලෙස හැදින්විය හැක. මෙම පහලවීම පලමු හා දෙවන පියවරේ සිදු වූවාසේ සමස්ථ අල් කුර්ආනයම එකවර පහල වීමක් මෙහි සිදු නොවීය. මෙම තුන්වන පියවර පහලවීම වසර 23 ක කාලයක් පුරාවට අදියරින් අදියර පහල වීම සිදුවිය. එනම්, මුහම්මද් (සල්) තුමාණන්ගේ වයස අවුරුදු 40 ක්ව පැවතිය දී අල්ලාහ් (දෙවි) විසින් එතුමාව දේවවක්තෘ හෙවත් නබිවරයෙක් ලෙස තෝරාගෙන දිව්‍ය වදන් හා නියෝග වන අල්කුර්ආනය එතුමාණන් වෙත පහල කිරීම ආරම්භ කරන ලදී. මෙලෙස මුහම්ටමද් (සල්) තුමාණන්ට පහල වූ අල් කුර්ආන් වදන් එතුමාණන් විසින් මිනිස් සමාජයට ප්‍රකාශ කරන ලදී. ඒ අනුව මුහම්මද් (සල්) තුමාණන්ට වයස අවුරුදු 63 දී මරණයට පත්වන විට එතුමාණන්ගේ වක්තෘ දිවිය අවුරුදු 23 ක් වූ අතර මෙම වසර 23 කාලය පුරාවට විටින් විට අල් කුර්ආනය වාක්‍ය පහල වීම සිදුවිය. (මේ පිලිබදව සවිස්තර කරුණු දැක්වීම මෙම ලිපියෙහි ඉදිරියට බලාපොරොත්තු වන්න.)
දිව්‍ය වදන් පහල කිරීම සම්බන්ධයෙන් අල් කුර්ආනය පරස්පර වන්නේ ඇයි?
මෙම ලිපිය ආරම්භයේ මතු කල පැනය එනම්, “අල් කුර්ආනය එක් රාත්‍රියකින් පහළ කල බව පැවසීම“ සහ “වසර 23 ක් පුරාවට මක්කාවේ සහ මදීනාවේ පහළ වූ බව පැවසීම“ යන පරස්පරය කුමක්ද? යන්න දැන් විමසා බලමු. අල් කුර්ආනය මිහිමතට පහළ වීම පිලිබදව විමසා බලන විට අල් කුර්ආනයේ ඉගෙන්වීම් තුල කිසියම් ආකාරයක පරස්පරතාවයක් ඇති බව පෙනේ. එය නිදසුනකින් පැහැදිලි කරන්නේ නම්,
- අල් කුර්ආනය එකවර පහල කල බව පහත වාක්‍ය පවසයි.
රමළාන් මාසය (කවරාකාර මාසයක් වන්නේද යත්) මනුෂ්‍ය වර්ගයාට (පරිසමාප්ත) මඟපෙන්වීම හා (නිවැරදි මාර්ගය දක්වන) පැහැදිලි ඉගැන්වීම්වලින් යුක්ත හා (සත්‍යය හා අසත්‍යය තෝරාගැනීමේ) මිණුම් දණ්ඩ ද, සැපයෙන අල්-කුර්ආනය පහළ කරන ලද මාසය වේ
අල්කුර්ආනය 2-185
නියත වශයෙන්ම අපි එය (අල් කුර්ආනය) කීර්තිමත් (කද්ර් නම්) රාත්‍රියෙහි පහළ කළෙමු.
අල්කුර්ආනය 97-1
- අල් කුර්ආනය කොටස් වශයෙන් පහල කල බව පහත වාක්‍ය පවසයි.
අල්-කුර්ආනය එකවරම පහළ නොකරන ලද්දේ මන්දැයි ප්‍රතික්ෂේප කරන්නෝ කියති. මෙලෙස(පහළ කරන ලද්දේ) එමගින් නුඹගේ සිත ශක්තිමත් කරනු පිණිසය. තවද(එම අරමුණ සඳහාම) අපි එය(අල්-කුර්ආනය) ක්‍රමක්‍රමයෙන් කොටස් වශයෙන් පහළ කළෙමු.
අල්කුර්ආනය - 25-32
කුර්ආනය අපි කොටස් කළෙමු, නුඹ එය ජනයාට ක්‍රම ක්‍රමයෙන් පාරායනය කරනු පිණිස, තවද අපි එය කඩින් කඩ පහළ කළෙමු.
අල්කුර්ආනය - 17-106
දැන් මෙම පරස්පරතාවය කුමක්ද? යන්න විමසා බලන්නේ නම්, මා ඉහතින් සදහන් කලාසේ අල් කුර්ආනය මිහිතලය මතට පහල වීම පියවර තුනකින් සිදු වී ඇත. එම පියවර තුනෙන් පලමු පියවර වන “අල් කුර්ආනය අල් ලව්හුල් පහ්ෆූල් පලකයේ සටහන් කිරීම“ සහ දෙවන පියවර වන “ලව්හුල් මහ්ෆූල් පලකයේ සිට පහල අහසට පහල කිරීම“ යන්න සමස්ථ අල් කුර්ආනයම එකවර සටහන් වීම හෝ පහලවීම සිදුවූවා යන්න පැහැදිලි වේ. එසේම මෙම පියවර දෙක අතුරින් “පහල කිරීමක්“ සිදුවන්නේ දෙවන පියවර වන “ලව්හුල් මහ්ෆූල් පලකයේ සිට පහල අහසට පහල කිරීම“ වන නිසා ඉහත අල් කුර්ආනය 2-185 වාක්‍ය මඟින් සහ 97-1 මඟින් කථා කරන්නේ එම දෙවන පියවර සහ පලමු පහලවීම පිලිබදව බවට තේරුම් ගැනීමයි සාධාර්ණ හා නිවැරදි තේරුම් ගැනීම වන්නේ.
අල් කුර්ආනය කොටස් වශයෙන් පහල වූ බවට සාක්ෂි
ඉතා පැහැදිලිව ම අල් කුර්ආනය මුහම්මද් (සල්) තුමාණන් වෙත එකවර පහළ වූයේ නැති බව පැහැදිලිව සදහන් කල හැක. අල්ලාහ් (දෙවි) හමුවේ සිට මුහම්මද් (සල්) තුමාණන් වෙත අල් කුර්ආනය පහලවීම එවකට සමාජ සිද්ධීන් සහ තත්වයන් අනුව විටින් විට වසර 23 ක් පුරාවට සිදු වූවා යන්න ඉස්ලාම් දහමේ සහ ඉතිහාස සාක්ෂි තහවුරු කරන සත්‍යයයි. එම කාරණය ඉස්ලාම් දහමේ මූලාශ්‍රයන් පදනම් කරගෙන විමසා බලන්නේ නම්, එය ව්‍යාකූලත්වයකින් තොරව තහවුරු කරන පද රාශියක් අල් කුර්ආනයේම දැක ගත හැක. එනම්,
අල්-කුර්ආනය එකවරම පහළ නොකරන ලද්දේ මන්දැයි ප්‍රතික්ෂේප කරන්නෝ කියති. මෙලෙස(පහළ කරන ලද්දේ) එමගින් නුඹගේ සිත ශක්තිමත් කරනු පිණිසය. තවද(එම අරමුණ සඳහාම) අපි එය(අල්-කුර්ආනය) ක්‍රමක්‍රමයෙන් කොටස් වශයෙන් පහළ කළෙමු.
අල්කුර්ආනය - 25-32
කුර්ආනය අපි කොටස් කළෙමු, නුඹ එය ජනයාට ක්‍රම ක්‍රමයෙන් පාරායනය කරනු පිණිස, තවද අපි එය කඩින් කඩ පහළ කළෙමු.
අල්කුර්ආනය - 17-106
ඉහත 25-32 සහ 17-106 වාක්‍ය සරලව විමසා බැලුවත් මෙම අල් කුරආනය එකවර පහල නොවූ බවත් එය කොටස් වශයෙන් පහල වූයේ ඇයිද? යන්නත් මනාව පැහැදිලි වේ. අල් කුර්ආනය පහල වූයේ පියවරින් පියවර කොටස් වශයෙන් යන්න නිදසුන් සහිතව තවදුරටත් තහවුරු කරන්නේ නම්,
දේවවක්තෘ මුහම්මද් (සල්) තුමාණන්ගේ ආදරණීය බිරිඳක් වන ‘අයිෂා (රලි) තුමියට එරෙහිව සමාජයෙන් එල්ල වූ කාමයේ වරදවා හැසිරීම නම් අපහස චෝදනාව සම්බන්ධයෙන් මුහම්මද් (සල්) තුමාණන්ට නිසි තීන්දුවක් ගැනීමට නොහැකිව දෙවියන් හමුවේ සිට අල් කුර්ආන් වාක්‍ය පහළ වන තෙක් දින කිහිපයක් බලා සිටීමට සිදුවූ අවස්ථාව මෙහි සදහන් කල හැක. ඒ අනුව එම සිද්ධිය මුල් කරගෙන පහත අල් කුර්ආන් වාක්‍යය පහල විම සිදුවිය.
නියතවශයෙන්ම මෙම අපවාදය ගෙනවිත් ඇත්තේ නුඹලාගෙන් එක් පිරිසකි. නුඹලාට එය නරකයැයි නුඹලා නොසිතනු. නැත. එය නුඹලාට හොඳය. ඔවුන් අතුරින් එක් එක්කෙනාට ඔහු උපයාගත් පාප(යේ දඬුවම) ඇත. තවද ඔවුන්ගෙන් නායකත්වය පවරා ගත් ඔහුට දරුණු දඬුවම ඇත.
අල්කුර්ආනය - 24-11
අල් කුර්ආනය කොටස් වශයෙන් පහළ වූ බවට තවත් තහවුරු කිරීමක් නම්, නබි (සල්) තුමාණන් සහ අන්ධ සහාභිවරයෙකු වන උම්මි මක්තුම් (රලි) තුමා අතර සිදු වූ සිද්ධියක් මූලික කරගෙන පහළ වූ වාක්‍ය කිහිපය මෙහි සදහන්යි කල හැක. එනම්, ඉස්ලාම් විරෝධි කුරෙයිෂ් ගෝත්‍ර නායකයින් ඉස්ලාමය වැළඳ ගැනීම සම්බන්ධයෙන් සාකච්චා කරමින් සිටින මොහොතක ඒ අතරට පැමිණි අන්ධ සහාභිවරයෙකු වන උම්මි මක්තූම් (රලි) තුමාගේ හැසිරීම සම්බන්ධයෙන් නබිතුමාණන්ට සිත් තැවුලක් ඇති විය. එම මොහොතේ පහත වාක්‍යය පහල විය. එනම්,
(අපගේ නබිවරයා වන) ඔහු කෝපයෙන් වෙව්ලූවේය. මුහුණ හරවා ගත්තේ ය. (කුමක් සඳහාද?), තමන් වෙත එක් අන්ධයෙකු පැමිණි නිසාය. (නබියේ! ඔබ වෙත පැමිණි) ඔහු, පරිශුද්ධවන්තයෙකු බවට පත් විය හැකිය යන්න ඔබ දන්නෙහිද?, නැතහොත් (ඔබගේ හොඳ ඔවදන) ඔහු සිතා, හොඳ ඔවදන මගින් ඔහු ප්‍රයෝජනයක් අත් කර ගත හැකිය යන්න ඔබ දන්නෙහිද?, (එසේ තිබියදී ඔහුව ඔබ කුමක් නිසා කෝපයෙන් වෙව්ලා ප්‍රතික්ෂේප කළෙහිද? නබියේ! ධර්මය) කවුරුන් නොසළකා හරින්නේද, ඔහු දෙසටම ඔබගේ අවධානය යොමු කරන්නෙහිය. ඔහු පරිශුද්ධවන්තයෙකු බවට පත් නොවුවහොත් ඒ ගැන ඔබ කෙරෙහි කිසිම වැරැද්දක් නැත (නොවෙද!), ඔහුම (අල්ලාහ්ට) බිය වන්නෙකි. කවුරුන් (තමන් විසින්ම) ඔබ වෙත දිව එන්නේද, එහෙත් ඔබ ඔහුව නොසලකා හරින්නෙහිය. එසේ කිරීම හොඳක් නොව. (ශුද්ධ වූ කුර්ආනය වන) මෙය ඇත්තෙන්ම හොඳ ඔවදනකි.
අල්කුර්ආනය - 80-1 සිට 11
මේ අනුව අල් කුර්ආනය පහල වීම සිදුවූයේ කවර ආකාරයකට ද යන්න දැන් ඔබට බොහෝ දුරකට පැහැදිලි ඇතැයි සිතමි. එසේම මෙම ලිපිය තුල ඉදිරියටත් තවත් ගැඹුරින් මෙම විෂයන් වෙනත් මාතෘකාවන් යටතේ ද සාකච්චා කිරීමට ද අපේකෂා කරමින් ඉදිරියට යොමු වෙමි.
අල් කුර්ආනය එකවර පහල නොවූයේ ඇයි?
අල් කුර්ආනය එකවර පහල කරනවාද? නොඑසේනම් කොටස් වශයෙන් පහල කරනවාද? යන්න දිව්‍ය නියමයකි. එමනිසා එම දේව සැලැස්ම මිනිසාට අභීයෝග කල නොහැක. යුදෙව් දස පනත මූසා (අලෛ) තුමාණන්ට එකවර පහල කල දෙවියන්ට අල් කුර්ආනය එකවර පහල කිරීම අපහසු කටයුත්තක් නොවේ යන්න මෙහි අප තේරුම් ගතයුතුය. එසේම මෙම අල් කුර්ආනය මිහිමතට එකවර පහල කලත් “ඇයි අල් කුර්ආනය කොටස් වශයෙන් පහල නොවී එකවර පහල වූයේ?“ යන පැනයත් මෙහි කිසියම් කෙනෙකුට මතු කරන්න පුළුවනි. මා එසේ පැවසීමට හේතුව අල් කුර්ආන් වාක්‍ය පහල වීමේ රටාව තේරුම් අරගෙන එය නිරීක්ෂණය කලේ නම් ප්‍රායෝගික සාර්ථක ක්‍රමවේදය අදාල සංසිද්ධීන් සහ අවස්ථාවන් මූලික කරගෙන ඒ ඒ නියෝග ඒ ඒ අවස්ථාවල පහල වීම යන්න පැහැදිලි වන බැවිණි.
එය කෙසේ වෙතත් අල් කුර්ආනය එකවර පහල නොකොට පියවරින් පියවර පහල කිරීම සම්බන්ධයෙන් අල්ලාහ් (දෙවි) පවසන හේතු කාරණයන් අල් කුර්ආනය තුලින් දැන් විමසා බලමු.
- මිනිස් සිත් ශක්තිමත් කරනු පිණිස
අල්-කුර්ආනය එකවරම පහළ නොකරන ලද්දේ මන්දැයි ප්‍රතික්ෂේප කරන්නෝ කියති. මෙලෙස(පහළ කරන ලද්දේ) එමගින් නුඹගේ සිත ශක්තිමත් කරනු පිණිසය. තවද(එම අරමුණ සඳහාම) අපි එය(අල්-කුර්ආනය) ක්‍රමක්‍රමයෙන් කොටස් වශයෙන් පහළ කළෙමු.
අල්කුර්ආනය 25-32
ඉහත වාක්‍ය මඟින් පවසන්නේ, අල් කුර්ආනය ක්‍රමානුකූලව හෙළිදරව් කිරීමේ අරමුණ නබි (සල්) තුමාගේ සහ ඔහු සමඟ සිටින විශ්වාසවන්තයින්ගේ (මුස්ලීම්වරුන්ගේ) හදවත් ශක්තිමත් කිරීම පිණිස බවයි. මෙය විනාඩියක් අරන් විමසා බලමු.
ඔබේ වෘත්තීය බලධාරියා ඔබේ වෘත්තීය ජීවිතයේ ඉදිරි වසර 23 සඳහා කළ යුතු සෑම දෙයක්ම සති අන්තයේ එක් සම්මන්ත්‍රණයකින් ඔබට පැවසූ බව සිතන්න. ඔබට එය නිවැරදිව මතකයේ රඳවාගෙන ඒ ඒ අවස්ථාවන්ට උචිත අයුරින් එය ප්‍රායෝගිකව ක්‍රියාවට නැංවිය හැකිද?. නමුත් ඒ ඒ අවස්ථාවල උපදෙස් හා නියෝග අවශ්‍ය ආකාරයට ලබාදෙමින් එය ප්‍රායෝගිකව ක්‍රියාවට නැංවන්නේ නම් අතපසුවීම්, අමතකවීම් වැනි දුර්වලතාවයන් ඇති නොවී මනසේ හොදින් රදවාගෙන සාර්ථකව කටයුතු කල හැකි වේ. මේ ආකාරයටම අල්ලාහ් (දෙවි) ද අප හට අල් කුරානය වසර ගණනාවක් තිස්සේ පහළ කිරීම තුල සිදු කරන්නේ ඉහත 25-32 හි පවසන ආකාරයට එය මනසේ ශක්තිමත් කිරීම නොවේද?.
- පාරායනය සරල කරනු පිණිස කොටස්කු කර ඇත.
කුර්ආනය අපි කොටස් කළෙමු, නුඹ එය ජනයාට ක්‍රම ක්‍රමයෙන් පාරායනය කරනු පිණිස, තවද අපි එය කඩින් කඩ පහළ කළෙමු.
අල්කුර්ආනය 17-106
ඉහත වැකියෙන් අල්ලාහ් (දෙවි) පවසන්නේ අල් කුරානය කොටස් වශයෙන් පාරායනය කිරීම පහසු පිණිස මේ ආකාරයට කොටස් වශයෙන් පහල කල බවයි. අල් කුර්ආනය ක්‍රමක්‍රමයෙන් හෙළිදරව් වීම නිසා ගැටලු මතුවන විට එහි විසදුම් සෙවීමත් පහසු වන අතර එහි අන්තර්ගත තොරතුරු තේරුම් ගැනීමට සහ අදාළ කර ගැනීමට කාලය ලැබෙන්නේය.
මෙයට මා නිදසුනක් මෙහි ගෙන් එන්නම්,
උහුද් සටනේදී මුහම්මද් (සල්) තුමාණන් ඝාතනය වූ බවට රාවයක් පැතිර ගියේය. මෙය ඇසූ මුස්ලිම්වරුට එම පුවත දරුණු කම්පනයක් ගෙන දුන්නේය. නමුත් එම රාවය මූලික කරගෙන පහත සඳහන් අල් කුර්ආන් වැකි පහළ විය.
මුහම්මද් හුදෙක් රසූල්(දේව දූත)වරයකු පමණි. ඔහුට පෙරද රසූල්වරු කාලාතික්‍රමණය කළාහුය. එසේ නම් ඔහු මළොත්, නැතහොත් (යුද්ධයේදී) ඔහු ඝාතනය කරනු ලැබුවහොත් නුඹලා නුඹලාගේ විදඹ මත ආපසු හැරි (අඥාන යුගයට ම) යන්නාහුද ඔහුගේ විදඹ දෙක මත ආපසු හැරී පළායන්නේ කවරෙක්ද? ඔහු අල්ලාහ්ට කිසිඳු හානියක් නොකරයි. කෘතවේදී අයට අල්ලාහ් (නිසි පරිදි) තිළිණ පිරිනමයි.
අල්කුර්ආනය 3-144
ඉහත සිද්ධිය රවයක් බව දැනගත් මුස්ලීම් ප්‍රජාව සතුටින් ජීවත් වූවත් ඉහත වාක්‍ය තුල අල්ලාහ් (දෙවි) “මුහම්මද් හුදෙක් රසූල්(දේව දූත)වරයකු පමණි. ඔහුට පෙරද රසූල්වරු කාලාතික්‍රමණය කළාහුය. එසේ නම් ඔහු මළොත්...“ යැයි පැවසීම තුල මේ මුහම්මද් (සල්) තුමාණන් දිනක මියයන බව මුස්ලීම්වරුන් තම සිත් තුල දාරනය කරගන්නා ලදී. ඒ අනුව නබිතුමාණන් වසර ගණනාවකට පසු සැබවින්ම මිය ගිය විට ඔවුන්ගේ සහචරයන් වූ මුස්ලීම්වරුන්ට එම වදන සැනසීම ලබා දුන්නේය. උහුද් සමයේ එම සිද්ධිය ඔවුන්ව සිතන්නට සහ යථාර්තය අවබෝධ කරගැනීමට අවස්ථාවක් ලබාදුනි. චිත්තවේගීය වශයෙන් දුෂ්කර තත්වයක් ගැන සිතීම සහ සැලසුම් කිරීම ඔබේ ස්ථාවරය පවත්වා ගැනීමට හොඳම ක්‍රමයකි. එය හදවත් ශක්තිමත් කරයි. මිනිසුන් මුහුණ දෙන සෑම දුෂ්කරතාවයක්ම අල් කුර්ආනය පහළ වීම තුල කොතැනක හෝ කථා කොට ඇත. මේ අනුව අල් කුර්ආනය එකවර මිනිස් සමාජයට පහල කිරීමට වඩා කොටස් වශයෙන් පියවරින් පියවර පහල කිරීමයි ප්‍රායෝගික නිවැරදි ක්‍රමවේදය වන්නේ යන්න මින් ඔබට පැහැදිලි වියයුතු වේ.
අල් කුර්ආනය පහල වීමේ අරමුණ කුමක්ද?
ඉස්ලාම් දහමේ දේව පුස්තකය වන අල් කුර්ආනය පහල වීමේ අරමුණ මේ යටතේ විමසා බැලීමට අදහස් කරමි. මිට සියවස් 14 කට පෙර අරාබි දේශයේ “මුහම්මද්“ නම් දේව වක්තෘවරයෙකු හට මෙම පුස්තකය පහල කල බව ඉස්ලාම් දහම පවසයි. එම පුස්තකය මිහිමතට පහල කිරීමේ අරමුණ කුමක්ද? යන්න දැන් විමසා බලමු.
අරාබි දේශයේ මක්කාව නම් නගරයේ ජීවත් වූ මුහම්මද් (සල්) තුමාණන්ට වයස අවුරුදු 40 ක්ව තිබියදී ප්‍රථම දේව පණිවුඩය ‘හීරා’ නම් ගුහාවකදී පහල විය. එතැන් පටන් ඉහතින් සදහන් කල ආකාරයට විවිධ අවස්ථාවල සමාජයේ ඇති වූ විවිධ ගැටළුවලට විසදුම් ලෙසත්, මිනිස් වර්ගයාට අවවාද අනුශාසනා ලෙසත්, යහපත් දිවියකට මඟපෙන්වන්නක් ලෙසත්, රාජ්‍ය පාලනයකට අවශ්‍ය උපදේශයන් ලෙසත්, දේව නැමදුම් පිලිබදව ඉගෙන්වීම් ලෙසත්… වසර 23ක් මුළුල්ලේ විවිධ අවස්ථාවල මෙම දේව පණිවුඩ පහල විය.
මෙසේ කඩින් කඩ කොටස් වශයෙන් දේව වදන් පහල කල බව අල්ලාහ් (දෙවි) තම පුස්තකයේ මෙසේ පවසයි.
(මුහම්මද්) නුඹ කුර්ආනය මනුෂ්‍යයනට පවසනු පිණිස අපි එය කොටස් කළෙමු. අපි එය කඩින් කඩ පහළ කෙළෙමු.
අල්කුර්ආනය 17-106
මෙලෙස කොටස් වශයෙන් පහල වීම ආරම්භ වු දේව පණිවුඩ මුහම්මද් (සල්) තුමාණන්ගේ වයස අවුරුදු 63 ක්ව තිබියදී (වක්තෘ මෙහෙවරට අවුරුදු 23 ක්ව තිබියදී) සම්පූර්ණයෙන් පහල වී අවසන් වූයේ පහත සදහන් අල්කුර්ආන් වාක්‍යය ද එය අවදාරනය කරමිනි. එනම්,
අද දින නුඹලාගේ දහම නුඹලා වෙනුවෙන් සම්පූර්ණ කරන ලදී.
අල්කුර්ආනය 5-3
මේ ආකාරයට වසර 23ක් මුළුල්ලේ පහල වූ අල්කුර්ආනය මෙලෙස මිනිස් සමාජයට පහල කිරීමට මූලික හේතු ද අල්ලාහ් (දෙවි) තම අල්කුර්ආනයේ විස්තර කරයි. එවැනි අල්කුර්ආන් වාක්‍ය කිහිපයක් ඔබේ බුද්ධිමත් විමසුමට මෙහි ගෙන එන්නේ නම්,
- මිනිසාට සත්‍යයෙන් අසත්‍ය වෙන්කර යහමඟ පැහැදිලි කිරීම පිණිස, (අල්කුර්ආනය 2-185)
- (ඉස්ලාමය පිලිගෙන එය) විශ්වාස කරන්නන් හට සුභාරංචි පවසනු පිණිස, (අල්කුර්ආනය 16-102)
- ලොව සියළු ජනයාට අවවාදයක් වනු පිණිස (අල්කුර්ආනය 25-1)
- (මිනිස් සමාජයට) අනුශාසනා කරනු පිණිස (අල්කුර්ආනය 36-6)
- සිත්වල ඇති රෝගයන් (ගැටළු) සදහා ප‍්‍රතිකාරයක් වනු පිණිස (අල්කුර්ආනය 10-57)
- (දෙවියන්ට)බියබැති පිරිසට උපදේශයක් වනු පිණිස (අල්කුර්ආනය 20-3)
- මිනිසාට යහමග පෙන්වීම පිණිස (අල්කුර්ආනය 2-185)
- (සමස්ථ සමාජයට) අවවාදයක් පිණිස (අල්කුර්ආනය 26-103)
- දෙවියන් වහන්සේ විසින් පෙර පහල කල වක්තෘවරුන්ගේ උපදේශයන් සත්‍ය කරනු පිණිස, (අල්කුර්ආනය 11-120)
ඉහතින් සදහන් ආකාරයේ උතුම් අරමුණු පෙරදැරිව පහල වූ අල්කුර්ආනය 6500 කටත් අධික වාක්‍ය ප්‍රමාණයකින් සමන්විත වන අතර ලොව අනිකුත් ආගමික පුස්තකයන් මෙන් නොවී අල්කුර්ආනය ආරම්භයේ පටන් අද දක්වා සම්පූර්ණයෙන් ම ආරක්ෂා වූ පුස්තකයක් ලෙස ද පවතී. (මේ පිලිබදව වැඩි විස්තර මෙහි පහතින් අල්කුර්ආනය ග්‍රන්ථාරූඪ වූ ඉතිහාසය නම් මාතෘකාව යටතේ ඉදිරියට සාකච්චා කෙරේ.) එම කාරණය ඔබේ වැඩිදුර දැනුමට තබමින් මෙම සටහන අවසන් කරන්නේ අල්කුර්ආනය සම්බන්ධ තවත් මාතෘකාවකින් ඔබ හමුවීමට තවත් යාවත්කාලීනයන් එක් කිරීමේ පොරොන්දුව ද ලබා දෙමිනි.
වීමේ අරමුණ නිවැරදිව අප තේරුම් ගෙන ඒ අනුව ජීවත් වීමට අධිෂ්ඨාන කරගමු යන ඉල්ලීම ඔබ හමුවේ තබමිනි.
අල් කුර්ආනය ග්‍රන්ථාරූඪ වූ ඉතිහාසය
අල් කුර්ආනය පිලිබදව කථා කරමින් එන මෙම ලිපිය තුලින් ිද දවසේ “අල් කුර්ආනය ග්‍රන්ථාරූඪ වූ ඉතිහාසය“ සහ “මෙම අල් කුර්ආනය පහල වූ එවකට සමාජ තත්වය කවරේද?“ යන්න විමසා බැලීමට අදහස් කරමි. මෙම අල් කුර්ආනය ග්‍රන්ථාරූඪ වූ ඉතිහාසය හා එවකට සමාජ පසුබිම පිලිබදව මුස්ලීම් නොවන සමාජයට පමණක් නොව මුස්ලීම් සමාජයේ ද බහුතරයකට ඇත්තේ අවම වූ දැනුමකි. මේ හේතුව නිසා මුස්ලීම් නොවන සමාජය බොහෝ පිරිස් අල්කුර්ආනය විවේචනය කරන්නේ ඉහත කරුණු කිසිවක් පිලිබදව මූලික දැනුමක් අවබෝධයක් නොමැතිවය. එවැනි විවේචන හමුවේ මුස්ලීම් සමාජයේ ද බොහෝ පිරිස් මුනිවත රකින ආකාරයක් දක්නට ලැබෙන අතර එසේ ඔවුනට ක්‍රියා කිරීමට සිදුව ඇත්තේ ඔවුනට ද මෙම විෂය පිලිබදව නිසි අවබෝධයක් නොමැති වීම හේතුවෙනි.
මෙවැනි අනවබෝධයන් තුරන් කිරීම අරමුණු කොට “අල්කුර්ආනය ග්‍රන්ථාරූඪ වූ ඉතිහාසය“ මෙතැන් සිට ඉදිරියට පහත අනුමාතෘකා ඔස්සේ සවිස්තරාත්මකව සාකච්චා කිරීමට අදහස් කරමි. එනම්,
* අල්කුර්ආනයේ ඉතිහාසය 01 – මුහම්මද් (සල්) තුමාගේ සාක්ෂර ඥානය * අල්කුර්ආනයේ ඉතිහාසය 02 – පහල වූ සමාජය මොනවගේද? * අල්කුර්ආනයේ ඉතිහාසය 03 – දේව පණිවුඩ පහලවීම * අල්කුර්ආනයේ ඉතිහාසය 04 – වහී පහලවීම හා ලේඛනගත කිරීම * අල්කුර්ආනයේ ඉතිහාසය 05 – මුල් භාෂාව හා එම භාෂාවෙන් පැවතීම * අල්කුර්ආනයේ ඉතිහාසය 06 – ආරම්භයේ පටන් සංශෝධනයන් නොවී පැවතීම * අල්කුර්ආනයේ ඉතිහාසය 07 – අල්කුර්ආන් පිටපත් ගැනීම * අල්කුර්ආනයේ ඉතිහාසය 08 – ලොව අනිකුත් ආගමික ඉගෙන්වීමන් ආරක්ෂිතද?
අල්කුර්ආනය ග්‍රන්ථාරූඪ වූ ඉතිහාසය 01 – මුහම්මද් (සල්) තුමාගේ සාක්ෂරතා ඥානය
අල් කුර්ආනය ග්‍රන්ථාරූඪ වූ ඉතිහාසය පිලිබදව කථා කරන මෙම මාතෘකාව තුල මුහම්මද් (සල්) තුමාගේ සාක්ෂරතා ඥානය පිලිබදව මෙහි කථා කරන්නේ කුමක්ටද? යන පැනය සමහර පිරිස් තුල මතුවීමට පුළුවන. මෙය බැලූ බැල්මට මෙම සාකච්චාවට අදාල නොවන මාතෘකාවක් ලෙස පෙනුනත් මෙම සාකච්චාව ඉදිරියට පවත්වාගෙන යාමේ දී නබිතුමාණන්ගේ සාක්ෂරතා ඥානයේ මට්ටම මෙම සාකච්චාවට සෘජුවම බලපාන කාරණයක් යන්න පැහැදිලි වේ. එනම්, අල් කුර්ආනය නම් දිව්‍ය පුස්තකය මිනිස් සමාජයට ප්‍රකාශ වන්නේ මුහම්මද් (සල්) තුමාණන් මඟිනි. එම පුස්තකය මිනිස් සමාජයට දේශනා කල මුහම්මද් (සල්) තුමාණන්ගේ “සාක්ෂරතා ඥානය ශූන්‍ය“ බව මා මෙහි පැවසුවේ නම් ඔබ විශ්වාස කරනවාද?. නමුත් එයයි ඇත්ත. එය අල් කුර්ආනය ද පහත අකාරායට අවදාරණය කරයි. එනම්,
(මාගේ දයානුකම්පාව පිරිනමන ලද අය නම්) තමන් ළඟ ඇති තව්රාත් සහ ඉන්ජිල්හි සඳහන් කරනු ලැබ ඇති (මේ) උම්මි (අකුරු ශාස්ත්‍රය නොදත්) නබි වන මේ රසූල්(වක්තෘ)වරයාව අනුගමනය කරන්නෝය. ඔහු (රසූල්වරයා) යහපත් දෑ (පිළිපදින ලෙස) ඔවුනට අණ කරයි. තවද අයහපත් දැයින් ඔවුන් වළක්වාලයි.
අල්කුර්ආනය 7-157
මුහම්මද් (සල්) තුමාණන් සාක්ෂරතා හැකියාවක් නොමැති “උම්මි“ නබිවරයෙකු (2) බව අල්ලාහ් (දෙවි) අල් කුර්ආනයේම පවසන ආකාරය ඉහතින් පැහැදිලිය. දැන් මෙතැන ඇති පැනය වන්නේ එතුමාණන්ගේ මෙම දුර්වලතාවය හා නොහැකියාව දහමට බලපාන්නේ කෙසේද? යන්නයි.
ඇත්තෙන්ම එතුමාණන්ගේ මෙම දුර්වලතාවය ඉස්ලාම් දහම ට විශාල ආශිර්වාදයක් වූවා යයි මා පැවසුවේ නම් එය ඔබ පිලිගන්නේද?. දැන් ඔබට තවත් පැනයක් මතුවීමට පුළුවන. එනම්, ‘කෙනෙකුගේ සාක්ෂරතා ඥානය ශූන්‍ය වීම ආශිර්වාදයක් වන්නේ කොහොමද?’ යන්නයි. ඒ පිලිබදව දැන් විමසා බලමු.
“අල් කුර්ආනය දිව්‍ය වැකි“ යයිද, එය “දේවදූතයකු මඟින් මුහම්මද් (සල්) තුමාණන්ට ප්‍රකාශ වූ“ බවද මුස්ලීම්වරුන් පිලිගැනීම හා විශ්වාසයයි. එවන් වූ මෙම අල් කුර්ආනයට එරෙහිව විවේචනය කරන පිරිස් මතු කරන ප්‍රධාන තර්කය වන්නේ මෙම අල් කුර්ආනය මුහම්මද් (සල්) විසින් ගොතන ලද්දක් යන්නයි. එසේම මෙලෙස චෝදනා නඟන පිරිස් පවසන්නේ අල් කුර්ආනය තුල ඇත්තේ “මුහම්මද“ විසින් ලියන ලද කරුණුය“ යන්නයි. වාදයකට මෙය සැබෑවක් ලෙස සැලකූවත් සාක්ෂරතා ඥානයක් නොතිබූ මුහම්මද් (සල්) තුමාණන් කොහොමද අරාබි සාහිත්‍යයේ ඉහල ම නිර්මාණ කෘතියක් වන මෙම අල් කුර්ආනය ලියන්නේ. එහි සාහිත්‍ය රසය පමණක් නොව එය සර්වකාලීන ප්‍රායෝගික වලංගු ජීවන මාර්ගයක් ගැන කථා කරයි. එපමණක් නොව නූතන විද්‍යාව, දේශපාලනය, ආර්ථිකය… යනාදී කරුණු සියල්ල 100% ක් නිවැරදිව මීට වසර 1400 කට පෙරම ස්වමතයෙන් මුහම්මද් (සල්) තුමාණන් මානව සමාජයට ප්‍රකාශ කලේ කෙසේද?.
මෙසේ චෝදනා නඟන පිරිස් මුහම්මද් (සල්) තුමාණන්ගේ සාක්ෂරතා හැකියාව පිලිබදව කොතරම් දුරකට දන්නවාද?. මෙලෙස මුහම්මද් (සල්) තුමාණන්ට එරෙහිව අවලාද නඟන පිරිස එතුමාණන්ගේ සාක්ෂරතා හැකියාව මනාව කියාපාන පහත අවස්ථාව බුද්ධිමත්ව විමසා බලන්නට ආරාධනා කරමි.
මුහම්මද් (සල්) තුමාගේ සාක්ෂරතා දැනුම හොදින් කියාපාන සිදුවීමක් ලෙස ඉස්ලාමීය ඉතිහාසයේ සිදුවු හුදෙයිබියා නම් ගිවිසුම සකස් කරන මොහොත සදහන් කල හැක. ඉස්ලාමීය ඉතිහාසයේ, ඉස්ලාම් විරෝධීන් හා මුස්ලීම්වරුන් අතර සිදු වූ තීරණාත්මක ගිවිසුමක් ලෙස ‘හුදෙයිබියා’ නම් ගිවිසුම හැදින් වේ. මෙහිදී මුහම්මද් (සල්) තුමාගේ පාර්ශවය (මුස්ලීම්වරුන්) වෙනුවෙන් ගිවිසුම ලියන ලද්දේ එතුමාගේ බෑනා වන අලි (රලි) තුමා විසිනි. එම ගිවිසුම සකස් කිරීමේ දී එම ගිවිසුමේ මුහම්මද් (සල්) තුමාණන්ගේ නම සටහන් කිරීමේ දී එම නමට ඉදිරියෙන් ‘වක්තෘ’ (දේව නියෝජිත) යන්න වක්තෘ මුහම්මද් (සල්) ලෙස ලියන ලදී. මෙය දුටු දෙවන පාර්ශවය (ඉස්ලාම් විරුද්ධවාදීන්) මෙම ගිවිසුම අප පිලිගෙන සාර්ථකව ක්‍රියාත්මක කිරීමට නම්, එහි සදහන් වක්තෘ යන පදය ඉවත් කලයුතු යැයි පවසා සිටින ලදී. ඒ අනුව එම ඉල්ලීමට මුහම්මද් (සල්) තුමාණන් එකඟ වී එම පදය ඉවත් කිරීමට තීරණය කලේය. එ අනුව මුහම්මද් (සල්) තුමාණන් තම බෑනා වන අලි (රලි) තුමා හට එම “වක්තෘ“ නම් පදය මකා දමන්න යැයි පවසන ලදි. නමුත් දේව වක්තෘ මුහම්මද් (සල්) තුමාණන් කෙරෙහි දැඩි ආදරයක් හා ගෞරවයක් දක්වන අලි(රලි) තුමා ඇතුළු එම ස්ථානයට රැස්ව සිටී සමස්ථ මුස්ලීම්වරුන් (සහාභාවරුන්) එසේ කිරීම ප්‍රතික්ෂේප කලේය. අලි (රලි) තුමාද එකහෙලා පවසා සිටියේ ඔබතුමා සැබැවින්ම අල්ලාහ් (දෙවියන්)ගේ දුතයාණන් ඉතින් කුමකටද එය මකා ඉවත් කරන්නේ එය මට කල නොහැකිය යැයි පවසන ලදී. එම මොහොතේ මුහම්මද් (සල්) තුමාණන් විමසා සිටියේ මෙම ගිවිසුමේ “වක්තෘ“ යනුවෙන් සටහන් වී ඇති තැන මා හට පෙන්වන්න මා විසින් ම එය මකා ඉවත් කරන්නම් යනුවෙනි.
ඉහත සංවාදය තුල පැහැදිලිව පෙනෙන කාරණය නම්, මුහම්මද් (සල්) තුමාණන්ට තමන්ගේ නම පවා ලියවී ඇති තැන සොයා ගැනීමට නොහැකි තරම් සාක්ෂරතා නොහැකියාවකින් පෙලුණු බවයි. මෙය දුර්වලතාවය වඩාත් හොදින් තහවුරු කරන අවස්ථාවක් ලෙස එතුමාගේ කාලයේ එතුමාගේ මූලිකත්වයෙන් විවිධ ප්‍රදේශවල රජවරුන්, පාලකයන් හා ප්‍රභූවරුන් වෙත ලියා යවන ලද ලිපි ගෙනහැර දැක්විය හැක. එම ලිපිවල තම නම ලියනවා වෙනුවට එතුමාණන් කලේ තම ලියා සකස් කරන ලද මූද්‍රාවක් භාවිතා කරමින් සටහන් යෙදීමයි. එසේ භාවිතා කල මූද්‍රාවේ අනුරුවක් සහ එතුමාණන් විසින් මූද්‍රව භාවිතා කොට සලකුණු කල ලිපියක් පහතින් ඉදිරිපත් කරමි.
- මුහම්මද් (සල්) තුමාණන් භාවිතා කල මූද්‍රාවේ අනුරුවක් මෙහි පහතින් දැක්වේ.
- නබිතුමාණන් විසින් යවන ලද ලිපියක්…
මේ තුලින් ද එතුමාගේ සාක්ෂර නොහැකියාව තවදුරටත් තහවුරු වේ.
මෙතැනදී විශේෂයෙන් කිවයුතු කාරණයක් ඇත. මුහම්මද් (සල්) තුමාණන්ගේ සාක්ෂරතා හැකියාව ශූන්‍යයක් වූවාද එවකට එම සමාජය එසේ නොවේ. එම සමාජය සාක්ෂරතා දැනුමින් අඥාන සමාජයක් නොවේ. එය මෙම ලිපි පෙල ඉදිරියට කියවීමේ දී ඔබට අවබෝධ වනු ඇත. එම කාරණය ඔබේ බුද්ධිමත් විමසුමට තබමින් මෙම ලිපියෙහි තවත් කොටසක් වෙත දැන් යොමු වෙමු.
අල්කුර්ආනය ග්‍රන්ථාරූඪ වූ ඉතිහාසය 02 – අල් කුර්ආනය පහල වූ ආරම්භ සමාජය මොනවගේද?
මීට වසර 1430 කට පමණ පෙර අරාබි දේශයේ මක්කා නම් නගරයේ ‘මුහම්මද්’ (සල්) නම් පුද්ගලයෙකු විසුවේය. ඔහු තම සමාජයේ සෑම සියළුදෙනාගේම ආදරය, ගෞරවය හා විශ්වාසය දිනාගත් යහපත් චරිතයෙන් යුතු ගුණවත් කෙනෙකු විය. ඔහුගේ එම චරිතවත් බව නිසාම ඔහුව එම සමාජය අස්සිද්ධික්, අල්අමීන් (විශ්වාසවන්තයා, සත්‍යවන්තයා) යන ගෞරව නාමයන්ගෙන් ආමන්ත්‍රණය කිරීම සාමාන්‍ය සිරිතක්ව පැවතීය. මේ ආකාරයට සමාජයේ සෑම සියළුදෙනාගේම සිත් දිනාගෙන කටයුතු කල එතුමාණන්ට තමන් වෙසෙන සමාජය හා එහි ක්‍රියාකලාපයන් පිලිබදව තිබුණේ දැඩි කලකිරීම හා පිලිකුලකි. එයට හේතුව නම්, එම සමාජයේ පැවති ආගමික මිත්‍යා ඇදහිලි, විශ්වාසය හා සමාජයේ පැවති විවිධ වූ අනාචාරයන් හා මිලෙච්ඡ ක්‍රියාවන් සුලබව දැකීමයි.
එවැනි කිහිපයක් ඔබේ වැඩිදුර අවදානය පිණිස මෙහි පහතින් පෙලගසන්නේ නම්,
- එම සමාජය කාන්තාවන් දුර්භාග්‍යයක් ලෙස සලකා කුඩාකලම ඝාතනය කරන සමාජයක් විය.
- දුප්පත්කමට බියේ දරුවන් ඝාතනය කරන සමාජයක් විය.
- විවාහය නමින් විවිධ ආකාරයේ අනාචාරයන් (බහු ලිංගික සම්බන්ධතාවයන්) පවත්වන සමාජයක් විය.
- පිලිම වන්දනාව (බහු දේව විශ්වාසය, දිනකට එක් දෙවියෙකු බැගින් දෙවිවරු 365ක් වන්දනා) කරන සමාජයක් විය.
- සියළු ක්‍රියාවන් ජෝතිෂ්‍ය විශ්වාසයන් මත පදනම්ව කටයුතු කරන සමාජයක් විය.
- මියගිය පිරිසගෙන් තම අවශ්‍යතාවය ආයාචනා කරන ඔවුනට නැමදුම් කරන සමාජයක් විය.
- කාන්තාවන්ට විවිධ වූ වධහිංසා පමුණුවන සහ කාන්තාව මනුෂ්‍යයෙකු ලෙස නොසලකන සමාජයක් විය.
- සමස්ථ සමාජයම සුරාවෙහි ගිලී පැවතී සමාජයක් විය.
- නිර්වස්ත්‍රව දේව නැමදුමෙහි නියැලෙන සමජයක් විය.
- පියා මියගිය හොත් පියගේ බිරිද (කුඩම්මා) තමා (පුතා) විවාහ කරගැනීම නීතියක් වූ සමාජයක් විය.
- කුලවාදය දරුණුවට ම ක්‍රියාත්මක වූ ජන සමාජයක් වීය.
- මනුෂ්‍ය ඝාතනය සාමාන්‍ය කාරණයක් ලෙස සිතෙන තරමට මිනිස් ජීවිතවලට වටිනාකමක් නොදුන් සමාජයක් විය.
- අරාබි භාෂාව පමණක් භාෂාවක් ලෙස සලකමින් අනිකුත් භාෂාවල් ප්‍රතික්ෂේප කල සමාජයක් විය.
මුහම්මද් (සල්) තුමාණන් තව වක්තෘ දිවිය ආරම්භ කිරීමට පෙර පැවති එනම්, හැදී වැඩුනු සමාජය මේ ආකාරයට විකෘති විශ්වාසයන්ගෙන් හා ක්‍රියාවන්ගෙන් අරාජිකව පැවති සමාජයක් විය. මේ හේතුව නිසා එම අරාජික සමාජය පිලිබදව එතුමාණන්ට තිබුණේ දැඩි කලකිරීමකි. ඒ හේතුව නිසාම එතුමාණන් බොහෝ විට සමාජයෙන් දුරස් වී සිටීමට උනන්දු වූ අතර එයට එතුමාණන් තෝරාගත් ස්ථානය වූයේ මක්කාව ආසන්නයේ ඇති ‘හීරා’ නම් ගල් ගුහාවයි. එතුමාණන් එහි ගොස් රුදීසිටීම සිරිතක් කරගත්තේය. (පහතින් දැක්වෙන්නේ එම ගුහාවයි)
මුහම්මද් (සල්) තුමාණන් මෙසේ “හීරා“ ගුහාව තුල දින ගණනාවක් හුදෙකලාවේ රැදීසිටීම පුරුද්ධක් කරගත්තේය. එසේ කාලයක් ගතවීමත් සමඟ දිනක් එම ගුහාවට මින් පෙර කිසිදු දිනක නොදුටු රූපයක් එතුමාණන් ඉදිරියේ දර්ශනය විය. එතැන් පසු එහි කුමක් සිදුවූයේද? යන්න මෙම ලිපියෙහි ඉදිරියට බලමු.
අල්කුර්ආනය ග්‍රන්ථාරූඪ වූ ඉතිහාසය 03 – දේව පණිවුඩ පහලවීම ඇරඹිම හා අවසන්වීම
ඉස්ලාම් දහම ප්‍රකාශ වීමට පෙර පැවති මක්කා සමාජය අරාජිකව පැවතී බවත්, මේ හේතුව නිසාම මුහම්මද් (සල්) තුමාණන් එම සමජයෙන් දුරස්ව “හීරා“ නම් ගුහාවක හුදෙකලාව කල්ගෙවන්න පුරුදු වූ බවත් මීට ඉහත සාකච්චා කලෙමි. මෙසේ කල්ගෙවන විට එක්තරා දිනයක එම ගුහාව තුල මින් පෙර කිසිදු දිනක නොදුටු රූපයක් එතුමාණන් ඉදිරියේ දර්ශනය විය. එය දැක නබිතුමාණන් බියට හා කලබලයට පත් වූ විට එම සුවිශේෂි මැවීම එතුමාණන් සමඟ කථා කරන්නට විය. තමන් ජිබ්රීල් (ගේබ්‍රියල්) නම් දේවදූතයකු (නොහොත් මලැක්වරයෙකු) බවත්, මුහම්මද් වන ඔබට අල්ලාහ් (දෙවි) නබිවරයෙකු (නොහොත් වක්තෘවරයෙකු) ලෙස තොරාගෙන ඇති බවත්, ඉදිරියේ දී ඔබට දේව පණිවුඩ පහලවීමට නියමිත බවත් මුහම්මද් තුමාණන් හට එහිදී දැනුම් දෙන ලදී. මීට පෙර මෙවැනි අත්දැකීමක් ලබා නොතිබූ එතුමාණන් මෙම පණිවුඩය අසා විශ්මයට හා බියටපත්ව නිවස කරා දුවවිත් තම බිරිද වන කදීජා (රලි)තුමියට සිදුවූ සියල්ල පවසන ලදී.
එය අසා කලබල නොවු එතුමිය එවකට පැවතී විවිධ ආගම් පිලිබදව ගවේෂණයන් හි නියලී සිටී ‘වරකා’ නම් ආගමික විශ්ලේෂකයකු වෙත මුහම්මද් (සල්)තුමාණන්ව කැදවාගෙන යන ලදී. එහි ගොස් සිදු වු සියල්ල සවිස්තරව ‘වරකාට’ පැවසූ විට එය සාවදානව අසා සිටී ඔහු (වරකා) බිය වියයුතු කිසිවක් නැති බවත්, මෙවැනි සිදධීන් මීට පෙරද සිදුවූ බවට ග්‍රන්ථවල සදහන් වී ඇති බවත්, ඔබ හමුවීමට පැමිණියේ ජිබ්රීල් නම් දේව දූතයෙකු බවත්, මුහම්මද් වන ඔබව දේව වක්තෘවරයෙකු ලෙස අල්ලාහ් (දෙවි) විසින් තෝරාගෙන ඇති බවත් දැනුම් දෙන ලදී.
මෙතැන් සිට තමන් වක්තෘවරයෙක් බව අවබෝධ කරගත් මුහම්මද් (සල්) තුමාණන් තමන් වෙත පහල වන දහම මක්කා සමාජය මධ්‍යයේ ප්‍රචාරය කිරීම ආරම්භ කරන ලදී. මුහම්මද් (සල්) තුමාණන්ට වයස අවුරුදු 40 ක්ව පැවතිය දී ප්‍රථම දේව පණිවුඩය ඉහතින් සදහන් ගුහාව තුල පහල වූ අතර එතැන් පටන් විවිධ අවස්ථාවල සමාජයේ ඇති වූ විවිධ ගැටළුවලට විසදුම් ලෙසත්, මිනිස් වර්ගයාට අවවාද අනුශාසනා ලෙසත්, යහපත් දිවියකට මඟපෙන්වන්නක් ලෙසත්, රාජ්‍ය පාලනයකට අවශ්‍ය සම්බන්ධ උපදේශයන් ලෙසත්, දේව නැමදුම් පිලිබදව ඉගෙන්වීම් ලෙසත්… මීට ඉහත මාතෘකාවන්ව හි සදහන්ස කලාසේ කඩින්ර කඩ වසර 23ක් මුළුල්ලේ විවිධ අවස්ථාවල මෙම දේව පණිවුඩ පහල විම සිදුවිය.
මෙසේ දිව්‍ය වදන් පහලවීම සිදුවූ මොහොතේ එහි සිදුවූයේ කුමක්ද? යන්න සහ මුහම්මද් (සල්) තුමාණන්ට පහල වූ පලමු අල් කුර්ආන් වාක්‍ය කුමක්ද? යන්න දැන් අවදානය යොමු කරමු.
- ජිබ්රීල් (අලෛ) තුමා “හීරා“ ගුහාවට පැමිණීමෙන් අනතුරුව එහි සිදු වූයේ කුමක්ද? යන්න අල් හදීසයක් මෙසේ විස්තර කරයි.
දේවත (ජිබ්රීල් (අලෛ), (මුහම්මද් වන) ඔහු හමුවට ඇවිත් කියවන්න යැයි පැවසුවේය. එයට නබිතුමාණන් පිළිතුරු දුන්නේ “මම කියවන්න දන්නේ නැහැ“ යනුවෙනි. තවදුරටත් නබිතුමාණන් පැවසීමේ දී 'දේවදූතයා මාව (බලහත්කාරයෙන් මෙන්) වැළදගෙන මට තව දුරටත් දරාගත නොහැකි තරමට තද කළේය. පසුව ඔහු මාව නිදහස් කර නැවත කියවීමට ඉල්ලා සිටි අතර මම පිළිතුරු දුන්නේ “මම කියවන්න දන්නේ නැහැ” යනුවෙනි. එවිට ඔහු නැවතත් මා වැළදගෙන මට තවත් දරාගත නොහැකි වන තෙක් දෙවන වරටත් තද කළේය. පසුව ඔහු මාව නිදහස් කර නැවත කියවීමට මගෙන් ඉල්ලා සිටියේය, නමුත් නැවතත් මම පිළිතුරු දුන්නේ "මම කියවන්න දන්නේ නැහැ" මා කුමක් කියවිය යුතුද?. යනුවෙනි. එවිට ඔහු තුන්වෙනි වතාවටත් මාව වැළදගෙන මාව තද කර, පසුව මාව නිදහස් කර මෙසේ කීවේය: “කියවන්න, මැවූ ඔබේ ස්වාමියාගේ නාමයෙන් මිනිසා මැව්වේ... (මෙසේ පහල වූ සම්පූර්ණ අල් කුර්ආන් වාක්‍යය පහතින් දැක්වේ.)
මූලාශ්‍ර ග්‍රන්ථය - බුහාරි
- ප්‍රථම වරට මිහිමතට පහල වූ අල් කුර්ආන් වාක්‍ය කොටස මෙසේය
(නබියේ! සියල්ලම) උත්පාදනය කළ ඔබ දෙවියන්ගේ ශුද්ධ වූ නාමයෙන් (මගේ නියෝගයන් අඩංගු ශුද්ධ වූ කුර්ආනය) ඔබ සමුදීරණය කරනු මැනව!, ඔහු මිනිසාව යුක්තානුවෙන් නිර්මාණය කළේ ය, නබිවරයාණෙනී! කියවනු! ඔබගේ දෙවි අති උත්කෘෂ්ඨවන්තයා ය, ඔහුම පෑනක් මගින් (ලිවීමට) ඉගැන්වූවේය, තවද (එමගින්) මිනිසා නොදන්නා දැය සියල්ල ඔහුට උගන්වා දෙන්නේය.
අල්කුර්ආනය 96 - 1 සිට 5
මෙලෙස ආරම්භ වූ අල් කුර්ආන් වාක්‍ය පහල වීම කොටස් වශයෙන් මුහම්මද් (සල්) තුමාණන්ට වයස අවුරුදු 63 ක් දක්වා වසර 23 ක් මුළුල්ලේ පහල විය. අවසානයේ මුහම්මද් (සල්) තුමාණන්ට වයස අවුරුදු 63 දී පහත සදහන් 5-3 අල්කුර්ආන් වාක්‍යය පහලවීමත් සමග ඉස්ලාම් දහම පරිපූර්ණ වී අල් කුර්ආන් වාක්‍ය පහලවීම ද අවසන් විය. එසේ පහල වූ අවසාන දිව්‍ය වදන මෙසේය…
අද දින නුඹලාගේ දහම නුඹලා වෙනුවෙන් සම්පූර්ණ කරන ලදී.
අල්කුර්ආනය 5-3
ඉහත සදහන් ආකාරයට වසර 23ක් මුළුල්ලේ පහල වූ වාක්‍යයන් 6500 කටත් අධික සංඛ්‍යාවකින් යුතු අල් කුර්ආනය අදටත් මුල් ආකාරයෙන්ම ආරක්ෂා වී මුස්ලීම් සමාජය තුල භාවිතයේ ඇත. මා මෙසේ පවසන විට එය කොතරම් දුරට සත්‍යයද? එහි වලංගුභාවය කොපමණද? යන පැනයන් සමහර පිරිසට මතුවීමට පුළුවන. කිසියම් දහමක පවසන නීතිරීතීන්, වත්පිලිවෙත්, අවවාද, අනුශාසනා… යනාදීය එහි ආරම්භයේ සිට ම ආරක්ෂා වී පැවතීම අනිවාර්‍ය අවශ්‍යතාවයක් යන්නේ මේ සමාජයේ කිසිදු කෙනෙකුට දෙවැනි මතයක් පැවතිය නොහැක. එසේම එම දහමේ හෝ දර්ශනයේ ඉගෙන්වීමන් ආරම්භයේ පටන් ආරක්ෂා වී ඇති ආකාරය ද එනම්, මුඛපරම්පරාගතවද?, සම්ප්‍රදායිකවද?, ලිඛිතවද? යන්නත් එම දහමට සෘජුවම බලපාන සාධකයන් වන බැවින් ඒ පිලිබදව ද මේ සමාජය බොහෝ සේ සැලකිලිමත් විය යුතුය. නමුත් සෑම දහමක් දර්ශනයක් තුල ම එලෙස සියල්ල ආරක්ෂා නොවනවා යන්න අද ලොව පවතින බොහෝ ආගම් හා දර්ශනයන් කියාපාන සත්‍යයකි. මෙවැනි පසුබිමක අල් කුර්ආනයේ තත්වය කුමක්ද?. යන්න විමසා බලන විට ඉහත දුර්වලතාවයන් සියල්ලෙන්ම අල් කුර්ආනය සුවිශුද්ධව පවතින බව පැහැදිලි වේ. මෙය තවදුරටත් මෙම සාකච්චා පෙලේ මීලඟ පියවර ලෙස “වහී හෙවත් දේව පණිවුඩ පහලවීම හා ලේඛනගත වීම“ යන කාරණය මෙතැන් සිට ඉදිරියට විමසා බැලීමට අදහස් කරමි.
අල්කුර්ආනය ග්‍රන්ථාරූඪ වූ ඉතිහාසය 04 – වහී හෙවත් දේව පණිවුඩ පහලවීම හා එය ලේඛන ගත කිරීම
කිසියම් දහමක දර්ශනයක ඉගෙන්වීමේ වලංගුභාවය රදා පවතින්නේ එහි පැවසෙන කරුණු මත පදනම්ව පමණක් නොව එම ඉගෙන්වීම ආරම්භයේ පටන් ආරක්ෂා වූ ආකාරය මත ද පදනම්ව යන්නෙහි විවාදයක් නැත. එවැනි මීට වසර 1430 කට පමණ පෙර අරාබි දේශයේ ප්‍රකාශ අල්කුර්ආන් ඉගෙන්වීමන් වසර 23 ක් මුළුල්ලේ කුඩා කොටස් වශයෙන් පහල වී ඒ සියල්ල ඒ ආකාරයට 100%ක් අදටත් ආරක්ෂා වී පවතිනවා යන්න පැවසීම බොහෝ දෙනෙකු තුල අවිශ්වාසයන් සැකයන් ඇති කරන්නක් විය හැක. නමුත් මෙම ලිපිය ඉදිරියට කියවීමේ දී එවන් පිරිස තුල මතු වූ එම අවිශ්වාසයට, සැකයට පැහැදිලි පිලිතුරක් ලැබෙනු ඇතැයි මා විශ්වාස කරමි. ඒ සදහා අවශ්‍ය වන්නේ විවෘත හා බුද්ධිමත් මනසින් මෙතැන් සිට මෙම ලිපිය විමසා බැලීම පමණි.
කිසියම් දහමක් හෝ දර්ශනයක් පිලිබදව විශේෂයෙන් එහි ඉගෙන්වීමන් පිලිබදව කථා කිරීමේ දී උපකල්පනයන් හා මනක්කල්පිතයන් මත හිඳ කථා නොකොට පිලිගත හැකි සාක්ෂි හා තර්ක මත හිඳ කථා කිරීම අනිවාර්‍ය මෙන්ම සාධාර්ණ ක්‍රමවේදයක් වේ. එසේ සාධාර්ණව කථා කිරීමට නම්, එම දහම හෝ දර්ශනයේ ඉගෙන්වීමන් පිලිගත හැකි ලෙස ආරක්ෂා වී පැවතීමත් අත්‍යඅවශ්‍ය වේ. මුල සිට ආරක්ෂා වූ මූලාශ්‍රයක් නොමැතිව කිසියම් දහමක හෝ දර්ශනයක ඉගෙන්වීමන් කථා කිරීම කිසිදු පදනමක් නොමැති මනක්කල්පිත හා හිස් වචන මාලාවන් පමණක් වනු ඇත. ඒ අනුව ඉස්ලාම් දහමේ ඉගැන්වීමන් දරා සිටින ආගමික මූලාශ්‍රය වන අල් කුර්ආනය,
- ආරම්භයේ පටන් මේ දක්වා සිදුව ඇති විකාශනයන් කවරේද?
- එම විකාශනයේ ආරම්භය මොනවාගේද?
- එය ආරක්ෂිතද?
යන්න පිලිබදව මෙතැන් සිට අවදානය යොමු කරමු.
මීට ඉහත සදහන් කලාසේ අල්කුර්ආන් වාක්‍යයන් පහල වීම මක්කා නම් නගරය ආසන්නයේ පිහිටී ‘හීරා’ නම් ගල් ගුහාවක් තුල ඇරඹුණි. මෙසේ දේව පණිවුඩ මනුෂ්‍යයකුට ප්‍රකාශ වීම අරාබි භාෂාවෙන් ‘වහී’ යනුවෙන් හදුන්වයි. ඒ අනුව දෙවියන්ගේ පණිවුඩය මනුෂ්‍යයෙකුට පහල වී ඔහු තුලින් සමස්ථ සමාජයටම එය ප්‍රකාශ වීම වක්තෘ මෙහෙවර යනුවෙන් ඉස්ලාම් හදුන්වයි. එම මෙහෙවරයි වසර 23 ක් මුළුල්ලේ මුහම්මද් (සල්)තුමාණන් මේ සමාජයට ඉටු කලේය. මෙතැනදී විශේෂ කාරණයක් මතු කොට දැක්විය යුතුව ඇත. එනම්, දේව පණිවුඩ පහල වීම යන්න මුහම්මද් (සල්) තුමාණන්ට පමණක් සිදු වු ලොව පලමු හෝ එකම සිද්ධිය නොවේ. ඉස්ලාමීය ඉගෙන්වීමට අනුවත්, බයිබලයේ සදහන් සමහරක් කරැණුවලට ද අනුවත් ආරම්භ මිනිසා (වන ආදම් (අලෛ)) තුමාගේ ගේ පටන් මෙම “වහී“ හෙවත් දෙවියන්ගේ පණිවුඩ මිනිස් සමාජයට ප්‍රකාශ වීම සිදුව ඇත. ඉස්ලාමීය ඉගෙන්වීමට අනුව මුල්ම මිනිසා වන ආදම් (අලෛ) තුමාණන්ගේ පටන් අවසාන වක්තෘවරයාණන් වන මුහම්මද් (සල්) තුමාණන් දක්වා විවිධ කාලවල, විවිධ ජන ගෝත්‍රවලට මේ ආකාරයට වක්තෘවරුන් හෙවත් නබිවරුන් ලක්ෂයකටත් අධික සංඛ්‍යවක් මේ පොළොව මත දෙවියන් විසින් තොරා පත්කොට මෙම මෙහෙවර එනම් දේව පණිවුඩ මිනිස් සමාජයට ප්‍රකාශ කිරීම සිදු කොට ඇත. එසේ දෙවියන් විසින් තෝරා පත්කරන ලද වක්තෘවරුන් කිහිප දෙනෙකුගේ නම අල්කුර්ආනයේම සදහන් වන අතර එම නම් මෙසේය..,
- ඉබ්බ්‍රහීම් (ඒබ්බ්‍රහාම් (අලෛ))
- ඉස්මායිල් (අලෛ)
- ඉසහාක් (අලෛ)
- යාකුබ් (අලෛ)
- ලූත් (ලොත් (අලෛ))
- දාවුද් (ඩෙවිඩ් (අලෛ))
- නුහ් (නෝවා (අලෛ))
- මූසා (මොසස් (අලෛ))
- ඊසා (යේසුස් (අලෛ))
- මුහම්මද් (සල්)
ඉහතින් දක්වා ඇත්තේ අල්කුර්ආනයේ (සහ බයිබලයේ) නම සදහන් වක්තෘවරුන් කිහිප දෙනෙකුගේ නම් පමණී. මීට අමතරව තවත් බොහෝ නබිවරුන් ගැන අල් කුර්ආනයේ සදහන් වන නමුත් ඔවුන්ගේ නම් සදහන් නොවේ. මෙලෙස පැමිණි සියළුම වක්තෘවරුන් හට පැවරී තිබු ප්‍රධාන රාජකාරීය වූයේ දෙවියන්ගේ පණිවුඩය “වහී“ මිනිස් සමාජයට ප්‍රකාශ කොට එකම දෙවියා වන ‘අල්ලාහ්’ වෙත සමස්ථ මිනිස් සමාජය කැදවීමයි. මෙය පහත අල්කුර්ආන් වාක්‍යය මෙසේ පවසයි.
“මා හැර වෙන දෙවියෙක් නැත. යන්න පවසා මිස දේව දුතයන් (වක්තෘවරුන්) නොයැව්වෙමු.”
අල්කුර්ආනය 21-25
මේ අනුව සෑම වක්තෘවරයෙකුම යවන ලද්දේ එකම දෙවියා වන ‘අල්ලාහ්’ වෙත මිනිස් සමාජය කැදවීම පිණිස යන්න ඉහත වාක්‍යයෙන් පැහැදිලි වේ. එසේම සෑම සමාජයකට ම වක්තෘවරයෙකු පහල කලා යන්නත්, එහි අවසාන වක්තෘවරයා මුහම්මද් (සල්) තුමාණන් යන්නත් ඉස්ලාම් දහමේ ඉගෙන්වීමයි. ඒ අනුව අවසාන වක්තෘවරයාණන් වන මුහම්මද් (සල්) තුමාණන්ට පහල කල ‘වහී’ වල එකතුවයි වර්ථමාන මුස්ලීම්වරුන් අල්කුර්ආනය ලෙස හදුන්වන්නේ. වසර 23ක් මුළුල්ලේ පහල වූ වාක්‍යයන් හි එකතුව වන මෙම අල් කුර්ආනය තුල ආගමික මූලාශ්‍රයක තිබිය යුතු අනිවාර්‍ය අංග තිබේද? යන්නත්, එය කොතරම් දුරට ආරක්ෂිතද? යන්නත් පහත අනුමාතෘකා ඔස්සේ දැන් විමසා බලමු.
- ලිඛිත ග්‍රන්ථයක් පැවතීම,
- ලිඛිත ග්‍රන්ථය එහි මුල් භාෂාවෙන් පැවතීම,
- මුල් භාෂාව අදටත් ආරක්ෂා වී පැවතීම,
- ආරම්භයේ සිට සංශෝධනයන් සිදුනොවී පැවතීම,
- දේශනා කල කාලය හා ග්‍රන්ථාරූඩ වු කාල අතර අන්තරයක් නොතිබීම,
- ලිඛිත ග්‍රන්ථයක් පැවතීම,
අල්කුර්ආනය ග්‍රන්ථාරූඪ වූ ඉතිහාසය 05 – මූලාශ්‍ර ලිඛිත ග්‍රන්ථයක් ලෙස පැවතීම
මෙහිදී ආගමික මූලාශ්‍රයක තිබිය යුතු පලමු අවශ්‍යතාවය වන “ලිඛිත ග්‍රන්ථයක් පැවතීම“ යන කාරණය වෙත අවදානය යොමු කලේනම්, ලොව සෑම දහමකට ම වාගේ අද වනවිට මූලාශ්‍ර ග්‍රන්ථයක් තිබීම දක්නට ඇත. ශ්‍රී ලාංකීය සමාජය සැලකුවත් එහි ප්‍රධාන ආගම් වන බුදුදහමට ත්‍රපිටකය ද, කිතුණු දහමට බයිබලය ද, හින්දු දහමට බගවත්ගීතය ද ආගමික මූලාශ්‍ර ලෙස තිබීම දක්නට ලැබේ. සුළු සුළු මිත්‍ය ඇදහිලි පවත්වාගෙන යන පිරිස් හැර අන් සෑම දහමකම ලිඛිත ග්‍රන්ථයක් තිබෙනවා යන්නෙහි විවාදයක් නැත. නමුත් එසේ තිබෙන ග්රන්ථයන් ඉහත අනිකුත් අවශ්‍යතාවයන් වන ලිඛිත ග්‍රන්ථය එහි මුල් භාෂාවෙන් පැවතීම, මුල් භාෂාව අදටත් ආරක්ෂා වී පැවතීම, ආරම්භයේ සිට සංශෝධනයන් සිදුනොවී පැවතීම, දේශනා කල කාලය හා ග්‍රන්ථාරූඩ වු කාල අතර අන්තරයක් නොතිබීම යන අවශ්‍යතාවයන් සපුරනවාද? යන්නයි මෙහි ඇති ගැටළුව. මේ පිලිබදව ද මෙම ලිපි තුලින් තවදුරටත් ඉදිරියට කථා කිරීමට අදහස් කරමි.
අල්කුර්ආනය ග්‍රන්ථාරූඪ වූ ඉතිහාසය 06 – ලිඛිත ග්‍රන්ථය එහි මුල් භාෂාවෙන් පැවතීම
මීට ඉහතින් ආගමික මූලාශ්‍රයක් ලිඛිතව තිබීමේ අවශ්‍යතාවය හා වැදගත්කම පිලිබදව කථා කල අතර ලිඛිත ග්‍රන්ථය එහි මුල් භාෂාවෙන් පැවතීම සහ එම මුල් භාෂාව අදටත් ආරක්ෂා වී පැවතීම වැදගත් යන්නත් එහි සටහන් කලෙමි. ඒ අනුව ආගමික ලිඛිත ග්‍රන්ථයක් එහි මුල් භාෂාවෙන් පැවතීමේ අවශ්‍යතාවය සහ එම භාෂාව අදටත් සමාජ භාවිතයේ සරලව පැවතීමේ අවශ්‍යතාවය යන්න දැන් විමසා බලමු.
ආගමක්, දර්ශනයක් සම්බන්ධයෙන් පමණක් නොව වෙන ඕනෑම ලිඛිත ලේඛනයක් එහි මුල් භාෂාවෙන් පැවතීම අනිවාර්‍ය අවශ්‍යතාවයක් වේ. එයට හේතුව පරිවර්ථනයක දී මූල ලේඛනයේ අදහස පිලිඹිබු නොවී වෙනත් අදහසක් මතුවීමේ හැකියාව ඇති බැවිණි. පරිවර්ථනයක දී එහි පරිවර්ථන දෝෂ ඇතිවීමට තිබෙන සම්භාවිතාවය ඉහලය. කිසියම් ලේඛනයක් වෙනත් භාෂාවකට පරිවර්ථනයක් සිදු කිරීමේ දී එය සිදු කරන තැනැත්තාගේ…
- මානසික තත්වය,
- ඔහු ජීවත්වන පරිසරය,
- ඔහුගේ භාෂා නිපුනතාවය,
- ඔහු එම විෂය කෙරෙහි දක්වන උනන්දුව,
- එම විෂය කෙරෙහි ඔහුට තිබෙන දැනුම,
යන සාධකයන් මත මුල් ලේඛනය හා පරිවර්ථන ලේඛන අතර පරස්පරතාවයන් හා විකෘති වීමන් ඇතිවිය හැක. මෙය තවත් සරලව පැහැදිලි කරන්නේ නම්,
ඉස්ලාම් දහම සම්බන්ධයෙන් ඉංග්‍රීසි බසින් ලියවුනු ග්‍රන්ථයක් ගෙන එය බෞද්ධයකු, කිතුණුවෙකු සහ ඉස්ලාම් භක්තිකයෙකු යන තිදෙනෙකුට ලබාදී එය සිංහල භාෂාවට පරිවර්ථනය කරන ලෙස පැවසුවා යයි සිතමු. නියත වශයෙන්ම පරිවර්ථන තුනම එක සමාන නොවනවා යන්න ඔබට පෙනී යනු ඇත. එසේ පරිවර්ථන සමාන නොවීමට බලපෑ හේතු අතර ප්‍රධාන හේතූන් වන්නේ මා ඉහතින් සදහන් කල කරුණු 05යි. මෙම තත්වය තවදුරටත් හොදින් තේරුම් ගැනීම පිණිස ඉහතින් සදහන් සිංහල පරිවර්ථන තුන නැවත එහි මුල්භාෂාව වන ඉංග්‍රීසි භාෂාවට වෙනත් තිදෙනෙකු මඟින් පරිවර්ථනය කිරීමට සැලැස්වුයේ නම් නියත වශයෙන්ම එය මුල්කෘතිය හා 100% ක් නොගැ‍ලපෙන බවත් ඔබට පෙනීයනු ඇත. මේ තුලින් පැහැදිලි වන්නේ ලිඛිත ලේඛනයක් පරිවර්ථනයක් තුලින් නිවරැදි අදහස ලබාගත හැක යන්න ප්‍රායෝගිකව සිදු නොවනවා යන්න සහා යමක් එහි නියම ස්වරූපයෙන් තේරුම් ගැනීමට නම් එය මුල් භාෂාවෙන් ආරක්ෂා වී පැවතීම අත්‍යඅවශ්‍ය යන්නයි.
එසේනම්, ඉහත කාරණය හොදින් මතකයේ රඳවාගෙන සියවස් ගණනාවක් මුඛ පම්පරාගතව පැවත ඇවිත් පසුකාලීනව ලේඛනගත වූ ආගමික මූලාශ්‍රයන් හි තත්වය මොහොතක් විමසා බලන්න. වසර ගනනාවක් මුඛ පරම්පරාගතව පැවතවිත් පසුකාලීනව එය ලේඛනගත වන විට ඉහතින් පැවසුවාට වඩා බොහෝ විකෘතිතාවයන් එහි ඇතිවීම නොවැලැක්විය හැකි තත්වයකි. විශේෂයෙන් ඉහත දුර්වලතාවයන් 05 සෘජුවම එයට බලපාන බව ඔබට පැහැදිලි වියයුතුය. මීට අමතරව එහි ලේඛනය කටයුතු කරන ලේඛකයා එම උපදේශයන්ගෙන් වැඩි කැමැත්තක්, උනන්දුවක් දක්වන කාරණයට වැඩි අවධානයක් ඇතුව හා අනිකුත් කාරණයන් වෙත අවම අවධානයක් ඇතුව ක්‍රියා කිරීමක් සිදුවිය හැක. මේ නිසාද එහි නියම ඉගෙන්වීම ඔහු තුලින් මතුවී නොඑන්නට පුළුවන. මෙයට සරල උදාහර්ණයක් ගෙනහැර දක්වනවා නම්,
පසුගිය දිනක මහාවංශය ගැන මහාවංසයට හිමි විය යුතු තැන සහ එයට දී තිබෙන තැන යන මැයෙන් ලියවුණු දීර්ඝ ලිපියක් අන්තර්ජාලයේ මාගේ නෙත ගැටුනි. එහි එක්තරා ස්ථානයක මෙසේ සදහන් වේ.
‘…මේ සියල්ල තිබුණා නම් අපට වඩා විශාල තොරතුරු ප්‍රමාණයක් එක් රැස් කරගන්න තිබුණා. ඒත් ඒ තොරතුරු මතත් අපිට වඩා දියුණු ඉතිහාසයක් ලියන්න අමාරුවෙයි. හේතුව මේව ලිව්වේ භික්ෂූන්. ඔවුන්ගේ උවමනාවන් වෙනස්. සාමාන්‍ය ජන ජීවිත ගැන ලියන එක ඔවුන්ට උවමනා කළේ නෑ. ඒකට ඒ අයට දොස් කියලත් වැඩක් නෑ. ඒ අය ක්‍රියා කළේ එදාට වැදගත් ය කියල පෙණුනු දේවල් වෙනුවෙන් මිස අද අපට වැදගත්ය කියල පෙනෙන දෙවල් වෙනුවෙන් නෙවෙයි…’ (3)
මෙයින් ද පැහැදිලි වන්නේ යම් තොරතුරක්, පණිවුඩයක් ලියන පුද්ගලයා ද එහි නිරවද්‍යතාවයට බලපාන බවයි. මේ නිසා යම් කෘතියක එසේත් නැත්නම් ලිපියක පවසන කරුණු නිවරුදිවම අවබෝධ කරගැනීම සදහා එය මුල් භාෂාවෙන් ම පැවතීම ඉතාමත්ම වැදගත් අවශ්‍යතාවයක් යන්න ඔබට පැහැදිලි වියයුතුය. මන්ද පරිවර්ථනයකින් යම්තාක් දුරට අවබෝධයක් ගතහැකි වුවත් ඉන් 100% ක නිවරුදි අවබෝධයක් ලබාගත නොහැකි වන බැවිණි.
මා මෙහි ඉහතින් පවසන අවාසනාවන්ත තත්වය සහ ඛේදවාචකය ඉස්ලාම් දහම පවසන අල්කුර්ආනය හැර ලොව සෑම දහමක් දර්ශනයක් තුලම අඩු වැඩි වශයෙන් දක්නට තිබෙනවා යන්නයි. එය කොතරම් අවාසනාවන්ත තත්වයක තිබෙනවා ද යන්න පවසනවා නම්, සමහරක් ආගමික මූලාශ්‍රයන් ප්‍රථම වරට ලියවෙන්නේ එය ප්‍රකාශ වූ මුල් භාෂාවෙන් නොව වෙනත් භාෂාවකින් වීමයි. එයින් සමහරක් පසු කාලීනව එහි මුල් භාෂාවට පරිවර්ථනය කිරීම සිදු කොට ඇත. මෙයට නිදසුනක් පවසනවා නම්, කිතුණූ ‘බයිබලය’ සදහන් කල හැක. යේසූස් වහන්සේ මිනිස් සමාජයට අනුශාසනා කරන්නේ ‘සුර්යානි’ නම් භාෂාවකිනි. නමුත් ප්‍රථම බයිබලය ලියවෙන්නේ ග්‍රීක භාෂාවෙනි. නමුත් පසු කාලීනව එනම්, ක්‍රි.ව. 200 දී එය “සුර්යානි“ භාෂාවට පරිවර්ථනය සිදු වේ. බයිබලයේ ඉරණම මෙලෙස හෝ නිවැරදි කරගත්ත ද ලොව පවතින සමහර ආගමි හි එහි මූලාශ්‍රයන් හි මුල් භාෂාව කුමක්ද? යන්න පිලිබදව පවා අදටත් වාද විවාද කරන අවාසනාවන්ත තත්වය වැටුනු ආගම් අදත් ලොව තුල දක්නට ලැබේ. එසේනම් තම මූලාශ්‍ර ග්රන්ථයන් සම්බන්ධයෙන් මෙවැනි දුර්වලතාවයන් පැවතීම තුල එම ආගම් හෝ දර්ශනයන් හි ඉගෙන්වීම් තුල කොතරම් නම් විකෘතීන් සිදුව ඇත්ද? යන්න බුද්ධිමත් සමජය විමසා බැලිය යුතු නොවේද?.
මේ අනුව ආගමක දර්ශනයක ඉගෙන්වීමන් එහි මුල් භාෂාවෙන් පැවතීමේ අවශ්‍යතාවයත්, එහි පරිවර්ථනය තුලින් නිවැරදි ඉගෙන්වීම අවබෝධ කරගැනීම 100%ක් සාර්ථක නොවන බවත් ඔබට දැන් පැහැදිලි වියයුතුය. එසේම මෙතැනදී විශේෂයෙන් සදහන් කලයුතු තවත් කාරණයක් ඇත. එනම්, කිසියම් කෘතියක් එසේත් නැත්නම් ලිඛිත ලේඛනයක් අධ්‍යනය කිරීමේ දී එය ලිඛිත මුල් භාෂාව අදටත් සමාජ භාවිතයේ ආරක්ෂා වී පැවතීමත් ඉහත අවශ්‍යතාවය සේම අනිවාර්‍ය අවශ්‍යතාවයකි. ඒ අනුව මෙම සාකච්චාවේ තවත් පියවරක් ලෙස ‘ඕනෑම දහමක ඉගෙන්වීමක් එහි මුල්භාෂාවෙන් පැවතීමේ වැදගත්කම’ යන්න විමසා බලමු.
අල්කුර්ආනය ග්‍රන්ථාරූඪ වූ ඉතිහාසය 07 – ආගමික මූලාශ්‍රවල මුල් භාෂාව ආරක්ෂා වී පැවතීමේ අවශ්‍යතාවය
ශුද්ධ වූ කුර්ආනය ග්‍රන්ථාරූඪ වූ ඉතිහාසය පිලිබදව කථා කරන මෙම සාකච්චා පෙලෙහි මීලඟට ආගමික මූලාශ්‍ර මුල් භාෂාවෙන් ආරක්ෂා වී පැවතීම සේම තවත් වැදගත් අවශ්‍යතාවයක් වන්නේ එහි මූල් භාෂාව අදටත් ආරක්ෂා වී පැවතීමයි. කිසියම් ඉගෙන්වීමක් එහි මුල් භාෂාවෙන් පැවතුනත්, එම භාෂාව ආරක්ෂා වී නැත්නම් එහි ඉගෙන්වීමන් වටහා ගැනීම අපහසු වේ. භාෂාව ආරක්ෂා වී පැවතුනත් එය සමාජයේ භාවිතයේ නැත්නම් එයින් ද පැහැදිලි අවබෝධයක් ලබාගැනීම ද දුෂ්කර කාර්යයක් වේ. යම්කිසි ඉගෙන්වීමක් හොදින් අවබෝධ කරගැනීමට නම් එහි භාෂාව සමාජ ව්‍යවහාරයේ සාමාන්‍ය පරිධි පැවතීම අත්‍යඅවශ්‍යය කාරණයක් වේ. නමුත් අවාසනාවකට ඉස්ලාම් දහම ප්‍රකාශ වූ අරාබි භාෂාව හැර වෙන කිසිදු ආගමික මුල් භාෂාවක් අදට ආරක්ෂා වී නැත. මෙහි අවසානාවන්තම තත්වය වන්නේ සමහරක් ආගමික මුල් භාෂාව කුමක්ද? යන්න පවා සොයැගත නොහැකි තරමට ඒ පිලිබදව සාක්ෂි සාධක නොතිබීමය. නමුත් ඉස්ලාම් දහම හෙවත් දෙවියන්ගේ පණිවුඩය දේවදූතයාණන් වන ‘ජිබ්රීල්’ (අලෛ) විසින් මුහම්මද් (සල්) තුමාණන් හට ප්‍රකාශ කල අරාබි භාෂාව අදටත් එය එලෙස ම ආරක්ෂා වී පවතින අතර අදටත් මැදපෙරදිග බොහෝ රටවල ප්‍රධාන භාෂාව මෙම අරාබි භාෂාවයි.
ඒ අනුව අල්කුර්ආනය ‘මුල් භාෂාවෙන් නොපැවතීම හා මුල් භාෂාව අදට නොපැවතීම’ යන දුර්වලතාවයෙනුත් මිදී එම චෝදනාවලින් සුවිශුද්ධ වී පවතී. මීලඟට ග්‍රන්ථයක් ලේඛනයක් සම්බන්ධයෙන් පැවතිය යුතු ප්‍රධාන අවශ්‍යතාවය වන්නේ එය විටින් විට සංශෝධනය නොවී ආරක්ෂා වී පැවතීමයි. විශේෂයෙන් ආගමික මූලාශ්‍රයක මෙය කිසිසේත් සිදුවිය නොහැක්කකි. ඒ අනුව මෙම සාකච්චා පෙලෙහි මීලඟට විමසා බැලිය යුතු කාරණය වන්නේ ‘අල්කුර්ආනය ආරම්භයේ පටන් සංශෝධනයන් නොවී ආරක්ෂා වී තිබෙනවාද?’ යන්නයි. ඒ අනුව මීලඟට එම මාතෘකාව වෙත දැන් යොමු වෙමු.
අල්කුර්ආනය ග්‍රන්ථාරූඪ වූ ඉතිහාසය 08 – ආගමික මූලාශ්‍ර ආරම්භයේ පටන් සංශෝධනය නොවී පැවතීමේ අවශ්‍යතාවය
ආගමික මූලාශ්‍රයක් එහි මුල් භාෂාවෙන් පැවතීමත්, එම මුල් භාෂාව සමාජ භාවිතයේ පැවතීමත් කොතරම් වැදගත් අවශ්‍යතාවයක් ද යන්න ඉහතින් විමසා බැලුවෙමු. ඒ ආකාරයටම ආගමික හෝ දාර්ශනික මූලාශ්‍රයක් කලින් කලට සංහෝධනය නොවී ආරම්භයේ පටන් මේ දක්වා ආරක්ෂා වී පැවතීමත් එම දහම හෝ දර්ශනයෙහි වලංගුභාවයට සෘජුවම බලපාන ප්‍රධාන සාධකයක්. නමුත් ලොව පවතින සියළුම ආගම් හි මූලාශ්‍ර ග්රන්ථ ඉතිහාසය අධ්‍යනය කලේ නම්, එම ග්‍රන්ථවලට අත්ව ඇති අවාසනාවන්ත ඉරණම් එනම්, එහි මුල් භාෂාවෙන් ආරම්භයේ පටන් ආරක්ෂා නොවීම, මුල් භාෂෘව සමාජ භාවිතයේ නොතිබීම සහ සංශෝධනය නොවී ආරක්ෂා වීම... යනාදී කිසිවක් ආරක්ෂා කරගැනීමට නොහැකිව සියල්ල ප්‍රශ්නාර්ථයක් වී ඇත. නමුත් මේ සියලු දුර්වලතාවයෙන් මිඳුනු හා ආරක්ෂා වූ දහමක් ද ඇත. ඒ ඉස්ලාම් දහමයි. (එය මෙම ලිපිය ඉදිරියට කියවීමේ දී ඔබට පැහැදිලි වනු ඇත.) අල්කුර්ආනය පහල වූ මොහොතේම ලේඛන ගත වී, එහි සංශෝධනයන් හා අතපසුවීමන් ඇතිවීම යන දුර්වලතාවයෙන් “අල් කුර්ආනය“ ආරක්ෂා වී ඇත. ඒ පිලිබදව තරමක් ගැඹුරින් විමසා බලන්නේ නම්,
දේශනා කල කාලය හා ග්‍රන්ථාරූඩ වු කාල අතර අන්තරයක් නොතිබීම
අල් කුර්ආන් වාක්‍යයන් පහල වු විට එනම්, මීට සියවස් 14 කට පෙර පැවතී “අරාබිදීප මක්කා“ සමාජය මධ්‍යයේ දිව්‍ය වදනක් අල්ලාහ් (දෙවි)ගේ දූතයාණන් නොහොත් නබිවරයා වූ මුහම්මද් (සල්) තුමාණන්ට පහල වූ විට එය ලේඛන ගත කිරීම සදහා විධිමත් සැලැස්මක් මුහම්මද් (සල්) තුමාණන් විසින් ක්‍රියාත්මක කරන ලදී. එවකට සමාජය ලේඛන කලාවෙන් නොදියුණු මට්ටමක පැවතුනත්, සාක්ෂර හැකියාවෙන් ඉතා දියුණු මට්ටම පැවතුණු බවට ඉතිහාස සාක්ෂි ඕනෑ තරම් දක්නට ඇත. මෙම තත්වය අරාබි දේශයේ පමණක් නොව එම කාල වකවාණුවේ මුළු ලොවපුරාම දකින්නට තිබූ පොදු තත්වයකි. (මෙය ශ්‍රී ලාංකීය සෙල් ලිපි ද වඩාත් හොදින් තහවුරු කරයි.) ඒ අනුව අල්කුර්ආනය එදා අද පවතින ආකාරයේ අලංකාර වු ග්‍රන්ථයක් නොවූවත් එහි සදහන් ඉගෙන්වීමන් ආරම්භයේ පටන් ලිඛිතව පැවතුණි. (මෙය තහවුරු කරන බොහෝ සාක්ෂි ඉතිහාසයෙන් හමුවේ.) එය තවදුරටත් හොදින් අවබෝධ කරගැනීම සදහා අල්කුර්ආනය ලේඛනගත වූ ආකාරය සහ එහි ඉතිහාසය තරමක් ගැඹුරින් විමසා බැලීම අත්‍යඅවශ්‍ වේ.
ඉහතින් සදහන් කලසේ මුහම්මද් (සල්) තුමාණන් හට සාක්ෂරතා හැකියාව නොතිබු නිසා තමාන්ට පහල වන දෙවි පණිවුඩ එසේ පහල වන මෙහොතේම ලිඛිතව සටහන් කර ගැනීම සදහා එවකට එම සමාජයේ සාක්ෂර හැකියාවන් පැවතී ලේඛකයන් 04 දෙනෙකු පත් කර තබන ලදී. ඔවුන් වන්නේ,
- සෙයිද් බින් සාබිත් (රලි)
- උබෙයි ඉබුනු කව්බ් (රලි)
- මුආද් ඉබුනු ජබල් (රලි)
- අබුසෙයිද් (රලි)
මේ සතර දෙනා හට මෙම වගකීම පැවරූ මුහම්මද් (සල්) තුමාණන් විසින් ඔවුනට විශේෂි නියෝගයක් ද ඒ සමඟ පනවන ලදි. එනම් මෙම 04 දෙනා ‘වහී’ හෙවත් දේව පණිවුඩ හැර වෙන කිසිවක් කිසිදු මොහොතක නොලිවිය යුතු යන්නයි. මෙවැනි නියෝගයක්මෙ ඔවුනට පැනවිමට හේතු විය යුත්තේ අල කුර්ආන් වාක්‍යයන් හා වෙනත් කිසිවක් මිශ්‍රවීම වලක්වා ගැනීම පිණිස වියයුතුය. ඒ අනුව දෙවියන් හමුවේ සිට නබිතුමාණන් වෙත පහල වන අල් කුර්ආන් වාක්‍යයන් ඉහතින් සදහන් හතරදෙනා ශාක පොතු, සත්ව ඇට, මැටි පුවරු, ගල් පුවරු සහා සත්ව හම් වැනි විවිධ ද්‍රව්‍යයන්වල ලේඛන ගත කිරීම සිදු කරන ලදී. මීට අමතරව මෙම අල්කුර්ආනය ආරක්ෂා කරගැනීම පිණිස මුහම්මද් (සල්) තුමාණන් හට දෙවියන් විසින් සුවිශේෂි බලයක් ද ලබාදී තිබුණි. එනම්, අල්කුර්ආන් වාක්‍යයක් පහල වු සැනින් එය මුහම්මද් (සල්) තුමාණන්හට අමතක නොවන ලෙස එය සිතෙහි තැන්පත් වීමයි. මෙය අල් කුර්ආනය පහත ආකාරයට අවදාරණය කරයි.
“අප නුඹට කුර්ආනය පාරායනය කර පෙන්වන්නෙමු. නුඹ එය අමතක නොකරන්නේය”
අල්කුර්ආනය 87-6
ඉහත ආකාරයට දෙවියන් හමුවේ සිට පහල වන අල් කුර්ආන් වාක්‍යයන් එක් පසෙකින් එම වාක්‍ය පහල වන මොහොතේම ලේඛකයන් මඟින් ලේඛනගත වෙමින් සහ තවත් පසෙකින් මුහම්මද් (සල්) තුමාණන්ගේ මනසේ එය තැන්පත් වෙමින් අල් කුර්ආන් වාක්‍ය ආරක්ෂා වීම සිදුවිය. මීට අමතරව එවකට ජීවත් වූ මුස්ලීම්වරුන් ද (ඔවුන් ‘සහාභාවරුන්’ (අනුගාමිකයින්) යයි හැදින්වේ) මෙම දේව වාක්‍යයන් වනපොත් කිරීමට ද පුරුදු පුහුණු වී සිටියේය. මෙය එවකට සමාජයේ පමණක් නොවේ එදා පටන් අද දක්වාම සෑම මුස්ලිම්වරයෙකුම අල්කුර්ආනයේ කොටසක් හෝ වනපොත් කර තිබීම තුලින් තහවුරු වේ. මීට අමතරව මෙම මුළු අල්කුර්ආනයම වනපොත් කල පිරිස් එවකට සමාජයේ පටන් අද දක්වාම ලොව සෑම සමාජයේ ම බොහෝමයක් පිරිස් සිටිති. උපකල්පනයකට මේ මොහොතේ ලෝකයේ තිබෙන සියළුම අල්කුර්ආන් ග්රන්ථ, softwares, Text, mp3… යනාදී සියල්ල විනාශ කලත් ඊලඟ විනාඩියේ ශ්‍රී ලංකාවේ ඕනෑම ගමකින් මෙම අල්කුර්ආනය නිවරුදිව ග්‍රන්ථාරූඨ කලහැකි මට්ටමේ මෙම අල්කුර්ආනය වනපොත් කල පිරිස් සොයාගත හැක. මෙලෙස අල් කුර්ආනය වනපොත් කොට සිටින පිරිස “හාෆිස්වරුන්“ ලෙස හැදින්වේ. සෑම මුස්ලීම් සමාජයකම (ගමකම, නගරයකම, රටකම) මෙම අල්කුර්ආනය වනපොත් කල කුඩා දරුවන් විශාල වශයෙන් සිටී. මෙය ද ලොව අන් කිසිදු දහමක හෝ දර්ශනයක දකින්නට නොලැබෙන සුවිශේෂි අංගයකි. මේ ආකාරයට අල්කුර්ආනය වනපොත් කිරීම ඉමහත් ගෞරවයක් ලෙසත්, උතුම් කුසල ක්‍රියාවක් ලෙසත් මුස්ලීම්වරුන් සලකති. මෙය දෙවියන් විසින් මිනිසුන්ගේ සිත්වල ඇති කරන ලද යහපත් හැඟිමකි. මෙය අල්කුර්ආනය මෙසේ පවසයි.
“එය (අල්කුර්ආනය) නුවණ ඇත්තාවුන්ගේ සිත්හි පැහැදිලි ආයාවන්ය.”
අල්කුර්ආනය 29-49
ඉහත විග්‍රහයට අනුව ඉස්ලාම් දහමේ මූලාශ්‍රය වන අල්කුර්ආනය මා ඉහතින් පැහැදිලි කලසේ අතීතයේ පටන් ලිඛිතව සහ වනපොත් ලෙස රැකුණු බව පැහැදිලි වේ. මේ ආකාර දෙකටම ආරම්භයේ පටන් මෙම අල්කුර්ආනය ආරක්ෂා වී පැවතුන ද එය ග්‍රන්ථරූඩ නොවීය. එම සමාජයේ සියළු දෙනා මෙය වනපොත් කොට සිටී බැවින් එවැනි ග්‍රන්ථයක අවශ්‍යතාවයක්ද එම සමාජයට ඇති නොවිය. නමුත් මුහම්මද් (සල්) තුමාණන්ගේ අභාවයත්, එතුමාගේ අභාවයෙන් පසුව විවිධ අවස්ථාවල මෙම දේව වාක්‍යයන් වනපොත් කොට සිටී මුස්ලීම්වරුන් ඉස්ලාම් විරෝධීන් අතින් ඝාතනය වීමත්, විශේෂයෙන් ‘යමාමා’ නැමැති සටනේ දී අල්කුර්ආනය වනපොත් කර සිටී මුස්ලීම්වරුන් (සහාභාවරුන්) විශාල පිරිසක් එකවර ඝාතනය වීමත් සමග අල්කුර්ආනය ග්‍රන්ථාරූඩ කලයුතු බවට එවකට එහි පාලකයා වශයෙන් සිටි අබුබක්කර් (රලි) තුමාණන් වෙත යෝජනාවන් ඉදිරිපත් විය. මුහම්මද් (සල්) තුමාණන්ගෙන් පසු ප්‍රථම රාජ්‍ය පාලකයා හෙවත් ජනාධිපතිවරයා වන මෙතුමාණන් ආරම්භයේ මුහම්මද් (සල්) තුමාණන් ජීවමානව සිටී සමයේ නොකල දෙයක් තමන්ට කල නොහැක යැයි පවසමින් එම යෝජනාව ප්‍රතිකෂේප කල අතර පසුකාලීනව එහි අවශ්‍යතාවය සහ අවදානම තේරුම්ගත් එතුමා අල්කුර්ආනය ග්‍රන්ථාරූඩ කිරීමට එකඟ විය.
ඒ අනුව මෙම අල්කුර්ආනය ග්‍රන්ථාරූඩ කිරීමේ කාර්‍ය පවරන්නේ කාටද? යන සංවාදය මතු වූ විට එය මුහම්මද් (සල්) තුමාණන් විසින් අල්කුර්ආන් වාක්‍යයන් ලිවීමට පත්කල 04 දෙනාගෙන් කෙනෙකු වන සෙයිද් බින් සාබිත් (රලි) තුමාගේ ප්‍රධානත්වයෙන් පත්වන කමිටුවකට බාරදිය යුතු යන යෝජනාව ඉදිරිපත් වී ඒ අනුව සෙයිද් බින් සාබිත් (රලි) තුමාගේ ප්‍රධානත්වයෙන් යුතු කණ්ඩායමකට එම වගකීම බාරදෙන ලදී. ඒ අනුව මෙම කමිටුව එවකට අල් කුර්ආන් වාක්‍යයන් වනපොත් කොට සිටි මුස්ලීම්වරුන්ගේ (සහාභාවරුන්ගේ) සහය හා එවකට විවිධ තැන් හි සටහන් කොට තැබූ මූල සටහන් හි පිටපත්වල සහය ද ඇතිව ප්‍රථමවරට දේව වාක්‍යයන් සියල්ල එක්කොට තනි ග්‍රන්ථයක් සකස් කිරීම කරන ලදී. මෙතැනදී සමහර පිරිසට ‘අල්කුර්ආන් වාක්‍යයන් ආරම්භයේ පටන් ලිඛිතව ආරක්ෂා වූවා නම්, වනපොත් කල පිරිසගේ සහය ලබාගත්තේ කුමකටද?’ යන පැනය ඇතිවීමට පූළුවනි. මෙහි දී වටහා ගතයුතු කාරනය වන්නේ මෙම අල්කුර්ආනය (ශාක පොතු, සත්ව ඇට, මැටි පුවරු, ගල් පුවරු සහා සත්ව හම් වැනි) විවිධ ද්‍රව්‍යයන් මත ලියාතිබූ නිසා එහි පිලිවලක් සකසා ගැනීම තරමක දුෂ්කර කාර්යයක් විය. නමුත් වනපොත් කරන විට එය මුහම්මද් (සල්) තුමාණන්ගේ අධීක්ෂණය යටතේ හා එතුමාණන්ගේ මගපෙන්වීම යටතේ සිදු වූ නිසා අල්කුර්ආනය නිසි ලෙස පෙල ගස්සවා ගැනීමේ දී මෙම වනපොත් කල පිරිසගේ සහය මහත් පිටුවහල් වන නිසා එම පිරිසගේ සහය ලබාගන්නා ලදී. මෙලෙස සකස් කල ලද ග්‍රන්තයයි අද මුස්ලීම් සමාජය ‘අල් කුර්ආනය’ ලෙස භාවිතා කරන්නේ.
ඒ අනුව අල්කුර්ආනය කිසිදු සංශෝධනයක් සිදු නොවී එය මුලසිටම ආරක්ෂා වූ බවත්, එය ඉතා ආරක්ෂාකාරී ලෙස ග්‍රන්ථාරූඪ වූ බවත් ඔබට පැහැදිලි වියයුතුය. මෙම සාකච්චාවේ තවත් පියවරක් ලෙස අල්කුර්ආනය පිටපත් ගැනීම යන කාරණය ඉදිරියට විමසා බලමු.
අල්කුර්ආනය ග්‍රන්ථාරූඪ වූ ඉතිහාසය 09 – අල් කුර්ආනය පිටපත් ගැනීම
අල් කුර්ආනය ග්‍රන්ථාරූඩ වූ ඉතිහාසය සාකච්චා කරන පෙලෙහි දැන් එහි තවත් කොටසක් ලෙස අල්කුර්ආන් මුල් කෘතියෙන් පිටපත් ලබා ගැනීම යන විෂය මෙහිදී සාකච්චා කිරීමට අදහස් කරමි. වත්මන් සමාජ භාවිතයේ පවතින අල් කුර්ආනය පූර්ණ ලෙස ආරක්ෂා වූ අල් කුර්ආනය ද යන්න විමසා බලන විට ඉහත විෂය ද මෙහි විමසා බැලිය යුතුම මාතෘකාවකි. ඒ අනුව මෙතැන් සිට එම විෂය වෙත මේ යටතේ අවදානය යොමු කරමි.
මීට ඉහත සාකච්චා කල ආකාරයට තැන් තැන්වල පැවතී අල් කුර්ආන් කොටස් ඒකරාශි කොට තනි ග්ග්‍‍රන්රථයක්න්ථා ලෙස සැකසීම එවකට පාලකයා වූ අබූබක්කර් (රලි) තුමා යටතේ සිදුවුණි. ඒ අනුව එම අල්කුර්ආන් මුල් පිටපත එවකට රටේ පාලකයා (ජනාධිපතිවරයා) භාරයේ තිබුණි. මෙසේ කාලය ගතවීමත් සමග විශේෂයෙන් තුනවන පාලකයා වන උස්මාන් (රලි) තුමාණන්ගේ පාලන සමය වන විට ඉස්ලාම් රාජ්‍ය සීඝ්‍රයෙන් පුළුල් වූ නිසා ඉස්ලාමයේ ඉගෙන්වීම සෑම ප්‍රදේශයකටම ව්‍යාප්ත කිරීමේ අරමුණින් පාලකයා සතුව තිබූ අල් කුර්ආන් ග්‍රන්ථයෙන් පිටපත් ගැනීම පිලිබදව අවදානය යොමු විය. ඒ අනුව අල්කුර්ආන් මූල ග්‍රන්ථයෙන් පිටපත් 07ක් ලබාගන්ත්නා ලද අතර එතෙක් සමාජයේ භාවිතයේ තිබූ අල්කුර්ආන් වාක්‍යයන් ලිය වී තිබූ ශාක පොතු, සත්ව ඇට, මැටි පුවරු, ගල් පුවරු සහා සත්ව හම්… යන සියල්ල එක්රැස් කොට ඒවා විනාශ කිරීම ද එවකට පාලක ජනාධිපති (උස්මාන් (රලි)) තුමා විසින් සිදු කරන ලදී. එසේ විනාශ කිරීමට මුලික හේතුව වුයේ, එවකට පැවතී සමාජය මෙම අල්කුර්ආන් වාක්‍යයන් ලියන ලද ශාක පොතු, සත්ව ඇට, මැටි පුවරු, ගල් පුවරු සහා සත්ව හම්… යනාදීය තබාගෙන නිසි පිලිවලක් නොමැතිව එය පාරායනය කිරීම නිසා අල්කුර්ආනය විදිමත් පරිධි මුස්ලීම් සමාජයට ලබාදීමයි.
ඒ අනුව අල්ඉ කුර්ආන් පිටපත් 07 ක් ලබාගත් එවකට පාලක උස්මාන් (රලි) තුමාණන් එම පිටපත් විවිධ ප්‍රදේශයන්ට බෙදාදීම ද කරන ලදී. එලෙස එදා පිටපත් ගන්නා ලද අල් කුර්ආන් 07 න් 02 ක් අදටත් ලොව ආරක්ෂා වී පවතී. ඒ “තුර්කිය“ රටේ “ස්තම්බුර්“ කෞතුකාගාරයේ සහා “රුසියාවේ“ “තාෂ්කන්ඞ්“ කෞතුකාගාරයේය. එය අදටත් ජනතා ප්‍රදර්ශනය සදහා ආරක්ෂිතව තබා ඇත. (මෙහි පහතින් දැක්වෙන්නේ එහි ඡායාරූපයකි)
මේ ආකාරයට අල්කුර්ආනය ග්‍රන්ථාරූඪ වූ ඉතිහාසය හා එතැන් පටන් මේ දක්වා අල්කුර්ආනය විකාශනය වූ ඉතිහාසය මෙලෙස ඉදිරිපත් කරන විට මේ කිසිවක්මෙ පිලිබදව නිසි අවබෝධයක් නොමැති මුස්ලීම් නොවන සමහර පිරිස් එදා එය ආරක්ෂා වූ බව සැබෑවක් වන්නට පුළුවනි. නමුත් එම ග්‍රන්ථය හා වර්ථමාන අල්කුර්ආන් ග්‍රන්ථය අතර කිසිදු පරස්පරතාවයක් නැතැයි පවසන්න පුළුවන්ද? යනුවෙන් පැනයන් මතු කිරීම අද දක්නට ලැබේ. මෙලෙස ඉදිරිපත්ම කරන එම පැනයට මා පිලිතුරු දෙනවාට වඩා මේ පිලිබදව පුළුල් පරියේෂණයක් කල පරියේෂණ වාර්ථාවක් මෙහි ඉදිරිපත් කිරීම වඩාත් සුදුසු යයි සිතමි. අල්කුර්ආනය පිලිබදව ජර්මනියේ මියුනිච් විශ්වවිද්‍යාල පරියේෂණ කණ්ඩායමක් සිදුකල එම පරික්ෂණය පහත ආකාරයට වේ.
මියුනිච් (Munich) විශ්වවිද්‍යාලයේ පරියේෂක කන්ඩායමක් අල්කුර්ආන් පිටපත්වල ඇති වැරදි හා සංශෝධන පිලිබදව පරියේෂණයක් සිදුකරන ලදි. ඔවුන්ගේ පරියේෂණවල මූලික අරමුණ වූයේ, අද සමාජ භාවිතයේ පවතින අල්කුර්ආනය හා අදටත් කෞතුකාගාරයේ ආරක්ෂා වි පවතින මුල් අල්කුර්ආනය අතර කිසියම් වෙනසක්, පරස්පරතාවයක් පවතිනවාද? යන්න සොයා බැලීමයි. මෙම පරියේෂණය සදහා ඔවුන් විසින් විවිධ කාලවල විවිධ රටවල් මුද්‍රණය කරන ලද අල්කුර්ආන් පිටපත් 42000ක් පමණ උපයෝගි කරගන්නා ලදී. මෙසේ පුළුල් පරියේෂණයක නිරත වු එම කන්ඩායම අවසාන ප්‍රතිඵල වාර්ථාව ඉදිරිපත් කලේ මෙසේය.
“හිජ්රි පලමුවන සියවස (ඉස්ලාමීය දින දර්ශනයට අනුව මුල් සියවස)යේ සිට 14 වන සියවසය (මේ ගෙවීයමින් පවතින්නේ 14 වන සියවසයයි එනම් මේ හිජ්රි 1431යි) දක්වා ලියන ලද සියලූම කුර්ආන් ග්රන්ථයන් අතුරින් සමහරක් මුද්‍රණ දෝෂ හැර වෙන කිසිදු ආකාරයක දෝෂයක්, වෙනසකමක් දක්නට නොමැත” (4)
ලොව කිසිදු කෘතියකට හිමි නොවන එම ගෞරවය අල්කුර්ආනය දිනාගත්තේ එය ආරම්භයේ පටන් ඉතා සැලසුම් සහගතව දිව්‍ය මඟපෙන්වීමකට අනුව ආරක්ෂා වූ නිසාම පමණි. මුස්ලීම් නොවන සමාජය මවිත කරවන ඉහත පරියේෂණ වාර්ථාව අල්කුර්ආනයේ මහිමය තවත් ඉහල නංවන්නක් නොවේද?. තවදුරටත් පවසන්නේ නම්, මෙම අල්කුර්ආනයේ අන්තර්ගතය පිලිබදව පුළුල් ගවේශණයක් සිදුකල විද්‍යාඥයෙකු වන ආචාර්‍ය මොරිස් බුකෙයිල් (Maurice Bucaille) තම “ද බයිබල්, ද කුර්ආන් ඇන්ඞ් සයන්ස්” (The Bible, The Quran and Science) යන කෘතියෙහි එක්තරා ස්ථානයක මෙසේ පවසයි.
“…අල්කුර්ආනය මුහම්මද් තුමාගේ කෘතියක් යයි පවසන්නන්ගේ කල්පිතය, සාවද්‍ය සහගත බව ඉහත සදහන් කරුණුවලින් පෙනේ. අකුරු නොදත්තෙකු විසින් මුළු මහත් අරාබි සාහිත්‍යයේ විශිෂ්ටතම සාහිත්‍යධරයා විය හැක්කේ කෙසේද? තත්කාලයේ අන් කිසිදු මිනිසෙකු නොදැන සිටී තරමේ අල්ප මාත‍්‍ර වරදකින් තොරව එබදු විද්‍යාත්මක සත්‍යයක් හෙලිදරව් කල හැක්කේ කෙසේද?” (පිටු අංක 125) (5)
මේ සියල්ල මුස්ලීම් නොවන සමාජය මවිත කරවන කාරණා වුවද මෙය මනුෂ්‍ය ශක්තිය ඉක්ම වූ දේව සැලැස්මක් යයි විශ්වාස කොට එය පිලිගෙන කටයුතු කරන මුස්ලීම්වරුන් වන අපට මේ කිසිවක් පුදුමයට කාරණයන් නම් නොවේ. මා මෙහි එසේ පැවසීමට තවත් හේතුවක් වන්නේ මෙම අල්කුර්ආනය ආරක්ෂා කිරීමේ වගකීම එය පහල කල දෙවියන්, තමන් විසින්ම භාරගෙන සිටීන බැවිණි. මෙය අල්ලාහ් (දෙවි) අල්කුර්ආනයේ මෙසේ පවසයි.
“ඇත්තෙන්ම අපමය කුර්ආනය පහල කලේ, ඇත්තෙන්ම අපමය එය ආරක්ෂා කරන්නේ”
අල්කුර්ආනය 15-9
මේ අනුව අල්කුර්ආනය ආරම්භයේ පටන් මේ දක්වා කිසිදු ආකාරයක විකෘතියකට ගොදුරු නොවී අද දක්වාත්, මතු අනාගතයටත් ආරක්ෂා වී පවතිනවා යන්නෙහි කිසිදු සැකයක් නොමැත. මෙය එසේ ආරක්ෂා වීමේ රහස එය සැබෑ දිව්‍ය පුස්තකයක් වීම සහ ඉහත 15-9 හි සදහන් ආකාරයට එය ආරක්ෂා කිරීමේ වගකීම දෙවියන් විසින්ම භාරගෙන සිටීම බව වටහා ගතයුතුය. එය එසේ නොවී එය ආරක්ෂා වීම මනුෂ්‍ය සැලැස්මක ප්‍රථිපලයක් නම් ලොව සෑම දහමක දර්ශනයක ම එහි ඉගෙන්වීමන් මෙලෙස ආරම්භයේ පටන් ආරක්ෂා වී පැවතිය යුතු වේ. නමුත් මෙම භාග්‍යය ඉස්ලාම් දහමට පමණක් උරුම වන්නටත් ලොව අනිකුත් දහමන් ට උරුම නොවීමටත් හේතුව මෙය දේව පුස්තකයක් වීම යන්න නැවත නැවතත් අවදාරණය කරමින් මෙම සාකච්චාවේ තවත් කොටසක් ලෙස අල් කුර්ආනය සේ ලොව අනිකුත් ආගමික මූලාශ්‍ර මුල සිට ආරක්ෂා වී නැත්තේද?’ යන කාරණය විමසා බලමු.
අල්කුර්ආනය ග්‍රන්ථාරූඪ වූ ඉතිහාසය 10 – අල් කුර්ආනය සේම ලොව අනිකුත් ආගමික මූලාශ්‍ර මුල සිට ආරක්ෂා වී තිබේද?
===
උපුටා ගැනීම්
- 1 - Visualizing the World’s Most Popular Religions
- 2 - Nabi al-Ummi
- 3 - “මහාවංසයට හිමි විය යුතු තැන සහ එයට දී තිබෙන තැන“
- 4 - HISTORY OF THE PRESERVATION OF THE QUR'AN
- 5 - The Bible, The Quran and Science
සබැඳි ලිපි පෙලගැස්ම
සබැඳි ලිපි මෙහි පහතින් කියවන්න
